As tractoradas poden volver paralizar Galicia
Os gandeiros de Lugo anuncian o inicio de novas protestas e a Plataforma en Defensa do Sector Lácteo di que fará o mesmo se non se soluciona o prezo do leite, que segue á baixa, pese as promesas da Xunta e Goberno central.
Por Galicia Confidencial | Compostela | 01/12/2015 | Actualizada ás 12:28
Lugo, primeiro, e o resto de cidades e vilas, despois, poden volver ser bloqueadas por centos de tractores, tal e como xa aconteceu hais unhas semanas. De feito, a cidade das murallas, que viviu un bloqueo de dez días, volverá a ser rodeada polos tractores o vindeiro 10 de decembro tal e como xa anunciaron ante a Subdelegación do Goberno os gandeiros desta provincia. Ademais, avisan de que poderían permanecer alí de forma "indefinida".
Unha medida á que se podería tamén sumar a Plataforma en Defensa do Sector Lácteo pola “difícil situación”, que din, están atravesando as explotacións leiteiras polos baixos prezos do leite, a pesar das promesas de Xunta, Goberno e distribuidoras que anunciaron unha suba.
Os gandeiros de Lugo tamén avisan de que queren concentrarse ante a sede da Xunta de Galicia en Lugo e mesmo, como medida de presión, ás portas das principais cadeas de distribución.
O portavoz de Unións Agrarias (UU.AA) na Plataforma en Defensa do Sector Lácteo, Óscar Pouse, recoñeceu que a posibilidade de iniciar de novo as tractoradas "é unha proposta que se está barallando.
“Todo vai depender tamén das decisións que adopte a propia Administración, dado que no seu día presentouse como garante do acordo que asinaron algunhas organizacións agrarias coa industria e a distribución baixo o paraugas do Ministerio de Agricultura”, suliña.
De feito, a Plataforma podería xa tomar unha decisión ao respecto esta mesma semana, para que "repercutan" canto antes" no prezo que se lle paga ao produtor polo leite.
