A Policía de Ecuador reforza a súa presenza na zona onde foi tiroteado un autobús cunha trintena de galegos
Un individuo armado disparou desde unha motocicleta contra a carrozaría e o parabrisas do vehículo coa intención de obrigar ao condutor a parar.
Por Europa Press / Redacción | SANTIAGO | 04/08/2024 | Actualizada ás 19:24
A Policía Nacional de Ecuador anunciou un reforzo do despregamento policial na zona de Posorja, na provincia de Guayas, onde o pasado mércores foi tiroteado un autobús con traballadores españois, entre os que había unha trintena de galegos. Ningún resultou ferido. O xefe de distrito da Policía, Mauricio Santamaría, explicou que o ataque se produciu sobre as 19.00 horas do mércores nunha rotonda da estrada Data-Posorja cando os traballadores eran trasladados a unha hostería tras traballar no mantemento dun barco atuneiro, informa o diario ecuatoriano 'El Telégrafo'.
Un individuo armado disparou desde unha motocicleta contra a carrozaría e o parabrisas do vehículo coa intención de obrigar ao condutor a parar. Con todo, o condutor realizou unha manobra evasiva e continuou para evitar o asalto, segundo explicou Santamaría. "O antisocial procede a disparar ao bus, tanto ao parabrisas como á carrozaría, pero o condutor continuou coa súa manobra e acelerou. O antisocial, ao ver que non puido executar o seu labor, desapareceu", apuntou.
Santamaría confirmou que non houbo persoas feridas e que ata o momento non se presentou unha denuncia formal polo feito. Aínda non se teñen pistas do suxeito que realizaría os disparos. O sector onde se produciu o incidente é unha zona abandonada e con pouca iluminación, polo que a hipótese que se manexa é que o ataque sería planificado, explicou. Segundo publicaron varios medios, os traballadores galegos aterraron este domingo á primeira hora no aeroporto vigués de Peinador, onde foron recibidos por familiares e amigos tras facer escala no aeroporto de Barajas.
