Ourense acollerá o primeiro campionato de tortilla de pataca de Galicia o 25 de outubro
A proba estará aberta a bares e restaurantes galegos que fagan este prato e haberá dúas modalidades da tortilla de patacas
Por E.P. | OURENSE | 07/08/2024 | Actualizada ás 19:29
Ourense acollerá o 25 de outubro, dentro do marco da Feira de Turismo enogastronómica Xantar, o primeiro campionato de Galicia de tortilla de pataca.
Así o presentaron este mércores o presidente da feira, Rogelio Martínez, o crítico gastronómico e organizador do Campionato de España de Tortilla de Patacas, Rafael García Santos, e o xornalista guipuscoano Josema Azpeitia, que organizará a competición.
A proba estará aberta a bares e restaurantes galegos que fagan este prato e haberá dúas modalidades da tortilla de patacas. Por unha banda, a tradicional tanto con como sen cebola e, por outra banda, a "tortilla de patacas con".
Nesta última modalidade, á tortilla pódenlle engadir un ou dous ingredientes adicionais, sempre que non supoñan máis do 10% da tortilla de patacas.
O obxectivo, explicaron, é que participen en cada modalidade 10 establecementos, entre eles haberá dous por provincia mínimo. Estes poderán participar nunha das modalidades ou en ambas.
O primeiro clasificado de cada unha delas poderá acudir directamente ao Campionato de España, que se celebrará en Alacante en setembro de 2025.
Ademais de locais que sexan seleccionados e convidados a participar por parte da organización do campionato, calquera establecemento que elabore tortilla de patacas, que destaque dentro da súa oferta culinaria, pode presentar a súa candidatura ao certame ata mediados de setembro.
Os establecementos aspirantes serán visitados por membros da organización, tanto de incógnito como de maneira oficial, para certificar a calidade dos pratos e avaliar a súa participación. Será a finais de setembro cando a organización emita a listaxe definitiva de concursantes e as bases.
