O alcalde de Ourense culpa ao tráfico do deterioro da Rúa do Progreso

O alcalde de Ourense, Gonzalo Pérez Jácome, asegurou que a deterioración da Rúa do Progreso débese ao paso do tráfico rodado e non coa celebración das festas.

Con esta declaración cualificou de "desatino" as realizadas polo delegado da Xunta de Galicia en Ourense, Manuel Pardo, este mércores, durante a súa visita ás obras de reposición da capa de rodaxe desta rúa.

Alí Pardo sinalou que os traballos se están executando cos medios de conservación de estradas da Xunta de Galicia e que terán unha duración dunha semana, antes de proceder a instalar unha nova sinalización horizontal.

A maiores explicou que o firme "está bastante deteriorado polo paso do tempo e tamén polas diferentes actuacións lúdico festivas que se realizan" nel. Con todo, engadiu que "o paso do tempo e a climatoloxía tamén inflúen", lembrando que Ourense "é unha cidade con altas temperaturas no verán e baixas no inverno", mantendo, iso si, que "a sobrecarga que poida haber por mor destas actividades tamén pode haber influído".

Estas afirmacións non lle gustaron ao rexedor municipal que trasladou mediante un comunicado que "é unha vergoña auténtica que a Xunta de Galicia leva seis anos sen arranxar un punto de máximo tráfico rodado na cidade".

Precisamente ao tratarse dun punto tan transitado cuestionou se "o cinco millóns de vehículos que pasan por el cada ano son irrelevantes" á hora de falar da deterioración do firme.

"Cando facemos festas nesta zona minimizamos a deterioración porque nese momento non pasan vehículos", aseverou o alcalde mediante o comunicado no que afea que "chama a atención" que o Goberno autonómico, "que autoriza meter camións para un festival na pista atletismo de Monterrey, diga que as persoas estragan o asfalto da rúa".

Gonzalo Pérez Jácome | Fonte: Rosa Veiga - Arquivo