O pleno de Ferrol aproba abandonar o Eixo Atlántico ao estimar que non se cumpren os seus "principais obxectivos"

O pleno do Concello de Ferrol aprobou abandonar o organismo Eixo Atlántico ao estimar que non se cumpren os seus "principais obxectivos", segundo o goberno que preside o popular José Manuel Rey Varela, que foi a única forza política que votou a favor desta saída, mentres que os outros tres partidos con representación no Consistorio, PSOE, BNG e FeC, votaron en contra. Foi durante a celebración do pleno ordinario de fin de mes, celebrado este xoves e no que o goberno de PP estimou que este organismo non está a cumprir "un dos principais obxectivos iniciais polos que se formou, como o conseguir fondos europeos".

Desde a oposición, Ángel Mato (PSOE) mostrou o seu rexeitamento a esta saída, lembrando que Ferrol foi un dos municipios fundadores, ademais de solicitar nova información que xustifique esta marcha. Tamén estimou que esta decisión o único que fai é "obedecer a instrucións internas do Partido Popular".

Desde o BNG, Iván Rivas, reclamou solucións para a cidade, como o illamento ferroviario que padece, e así pediu unha postura común para poder reverter esta situación, "sexa dentro ou fóra do Eixo Atlántico", mentres que Jorge Suárez, portavoz de Ferrol en Común, valorou como "moi negativa esta saída tomada en solitario polo PP e que unha vez máis volve utilizar o rodete". Segundo Suárez, a saída foi motivada "por ordes directas do PP e que veñen tras unhas críticas persoais do seu xerente" ao proxecto de Altri.

NOMEAMENTOS

Noutra orde de asuntos, o pleno aprobou por unanimidade o nomeamento de Benito Vicetto como Fillo predilecto de Ferrol a título póstumo, tras cumprirse o segundo centenario do seu nacemento nesta cidade. Tamén se deu luz verde, cos votos a favor de PP, PSOE e FeC, e a abstención do BNG, de iniciar o expediente para denominar o estadio de fútbol da Malata como estadio municipal Isidro Silveira, en honra do que foi varios anos presidente do Racing de Ferrol. "O estadio é de todos os ferroláns e abrimos agora a participación para recoller todas as opinións, queremos alcanzar a mellor denominación e conseguirémolo escoitando aos ferroláns", afirmou o alcalde de Ferrol.

Por último, tamén se aprobou, cos votos a favor do goberno e do grupo municipal do PSOE, e en contra do BNG e FeC, para iniciar o expediente para nomear ao actual almirante do Arsenal Militar de Ferrol, Ignacio Frutos, como Fillo adoptivo de Ferrol.

Pleno do Concello de Ferrol. CONCELLO DE FERROL | Fonte: Europa Press