Montan un dispositivo de busca dun preso por bater na ex parella e ameazar ao seu ex cuñado
Tamén se lle considera autor de agresión ao actual mozo da muller e ao fillo deste.
Por Europa Press / Redacción | SANTIAGO DE COMPOSTELA | 04/09/2024 | Actualizada ás 11:48
A Garda Civil de Ourense detivo, na tarde do martes, a un veciño de Avión, de 54 anos, como presunto autor dos delitos de violencia de xénero, dous delitos de lesións, un delito de furto, danos e ameazas.
Segundo informa, o detido é interno de terceiro grao do Centro Penal de Pereiro de Aguiar e estaba de permiso de fin de semana. Ao personarse no seu domicilio, explica, agrediu á súa exparella, ao mozo dela e a un fillo del. Así mesmo, "apoderouse de 450 euros, asperxeu o vehículo do seu excuñado de gasolina e ameazouno de morte".
Posteriormente encerrouse no domicilio e "deuse á fuga polo tellado" cando observou a presenza da Garda Civil, desprazada ao lugar. Os axentes montaron un dispositivo de procura e protección da vítima durante a tarde deste martes e grazas á colaboración cidadá procedeuse á detención do home nun monte próximo á localidade de Avión.
O detido pasará este xoves a disposición xudicial no Xulgado de Ribadavia, apunta a Benemérita en relación ás actuacións que se seguirán.
