Autorizada a construción do parque eólico Patiñeiro, con tres aeroxeradores en Vimianzo

O Diario Oficial de Galicia (DOG) publica este venres a autorización administrativa previa e autorización administrativa de construción do parque eólico Patiñeiro, promovido por Naturgy Renovables, e que contará con tres aeroxeradores. Segundo se recolle na resolución da Dirección Xeral de Enerxías Renovables e Cambio Climático, a potencia instalada será de 18 MW (6 MW por cada aeroxerador) e a produción neta prevista é de 60.530 MWh cada ano.

O parque eólico Patiñeiro, que conta cun orzamento de execución de 17,8 millóns de euros, contempla tamén outras instalacións auxiliares, como subestación, torre meteorolóxica, rede eléctrica soterrada, etc.

Naturgy Renovables deberá comunicar cunha antelación mínima dun mes o inicio das obras e, durante as mesmas, deberá informar se se producen perturbacións ou interferencias nos servizos de telecomunicacións, ademais de tomar as medidas necesarias para restablecer as condicións de calidade nos servizos afectados. Ademais, a partir da publicación desta autorización previa, ten un prazo de 3 anos para solicitar a correspondente autorización de explotación.

A promotora solicitou a primeira autorización para este parque en setembro de 2019, aínda que un ano despois presentou unha modificación do proxecto ao variar a localización dos aeroxeradores, cinco naquel momento. A partir de aí comezouse toda a tramitación, incluída a declaración de impacto ambiental.

Precisamente, a consecuencia da tramitación ambiental, Natugy propuxo modificar o proxecto, eliminando dous dos 'muíños' e substituíndo o modelo dos mesmos para aumentar a súa potencia de 5 a 6 MW. En maio deste ano, a Dirección Xeral de Calidade Ambiental e Sostibilidade formulou a declaración de impacto ambiental, cualificándoo como viable.

OUTROS PARQUES EÓLICOS

Por outra banda, o Diario Oficial de Galicia tamén publica este venres a resolución pola que se fai público o acordo do Consello da Xunta (de febreiro pasado) que declara a utilidade pública do parque eólico de Serra da Lagoa, en Baralla, e a súa compatibilidade con diversos aproveitamentos forestais.

Así mesmo, publícase a relación de persoas titulares de parcelas afectadas pola construción deste parque, promovido por Enerxías Renovables de Galicia, que non puideron ser notificadas e ás que se empraza para acudir á Dirección Xeral de Enerxías Renovables e Cambio Climático no prazo de 10 días.

O DOG tamén fai pública a relación de bens e dereitos afectados pola expropiación do parque eólico Airas, situados nos municipios lucenses de Alfoz e Mondoñedo, e promovido por Fergo Galicia Vento-Alfoz. Os propietarios deberán presentar a folla de aprecio na que se concrete o valor da indemnización que estimen que lles corresponde no prazo de 20 días.

Aeroxeradores no parque eólico de Serra do Larouco / Europa Press / Europa Press