O PPdeG pedirá que Sánchez deixe de "castigar a Galicia" con impostos sobre residuos para que "non repercutan" nos concellos

Os representantes do PPdeG no Congreso e no Senado presentarán a próxima semana unha iniciativa para esixir ao presidente do Goberno central, Pedro Sánchez, a eliminación dos impostos "que castigan" a xestión de Sogama, a entidade pública que xestiona os residuos do "94 % dos concellos". Nun comunicado, os populares explicaron que, por mor da aplicación de "varios impostos estatais e outras decisións lesivas" de Executivo central, Sogama "viuse obrigada a actualizar o seu canon".

Por iso, solicitan ao Goberno central a súa retirada para que a empresa pública de xestión de residuos "non teña que repercutilos" nos concellos e estes á súa vez aos veciños. "Non entendemos como España é un dos poucos países, por non dicir o único da Unión Europea, que decide gravar con impostos algo que se está facendo ben como é a valorización dos nosos residuos", apuntou a conselleira de Medio Ambiente e Cambio Climático, Ángeles Vázquez, nunha reunión cos deputados e senadores dos populares galegos.

Con iso, fixo referencia aos "tributos que foron introducidos" coa Lei 7/2022, de 8 de abril, de residuos e chans contaminados para unha economía circular. Unha lei, continuaron os populares, á que o goberno galego "se opuxo" durante o período de alegación e á que o PP "votou en contra, pero foi aprobada coa complicidade dun BNG sempre manso en Madrid e dun PSdeG cuxa única lealdade é a Pedro Sánchez en detrimento dos intereses de Galicia".

Reunión da conselleira de Medio Ambiente e Cambio Climático, Ángeles Vázquez, con senadores e deputados dos populares galegos | Fonte: PPDEG