O PSdeG ve "ridículo" que Ángeles Vázquez pida en Europa desatascar un parón eólico "provocado polo PP"
Segundo expuxo o eurodeputado socialista galego, Nicolás González Casares.
Por Europa Press / Redacción | Lugo | 11/09/2024 | Actualizada ás 18:28
O eurodeputado socialista galego, Nicolás González Casares, tachou de "ridículo" que a conselleira de Medio Ambiente, Ángeles Vázquez, se derprazou a Bruxelas para tentar que a Comisión Europea presione ao Tribunal Superior de Xustiza da Unión Europea (TJUE) ante un "parón eólico provocado polo PP". A reunión mantida este mércores pola conselleira co director xeral do Servizo Xurídico da Comisión Europea, Daniel Quella, "só serviu para constatar o descoñecemento profundo das institucións comunitarias e das súas responsabilidades".
"Afirmar que vén a Bruxelas a falar coa Comisión para que presione ao TJUE nun asunto que está a estudar é unha de torpeza manifesta e proba a tendencia innata do PP á ingerencia", asegurou. Para o eurodeputado, a Xunta debe deixar de "botar balóns fóra" en relación ao parón eólico en Galicia, dado que "se Galicia caeu á cuarta posición en implantación eólica é pola oposición e falta de planificación do PP en materia de renovables con Feijóo e con Rueda".
"O que debe facer a Xunta é porse as pilas e aplicar o pacto eólico promovido polo PSdeG-PSOE para unha implantación sustentable, que teña en conta ao conxunto da sociedade", aseverou. Casares asegurou que, en materia eólica, "o PP non sabe nin de onde lle sopra o vento" e recomendoulle á conselleira que consulte a nova directiva de enerxías renovables, aprobada o ano pasado para que "entenda a dirección tomada por Europa e as obrigacións da Xunta".
"A conselleira veu a Bruxelas para que a Comisión lle acabe lendo a cartilla sobre as obrigacións establecidas na nova directiva de renovables, por exemplo en canto aos criterios para planificar e autorizar o desenvolvemento renovable, fixados na nova directiva, como o establecemento das áreas de aceleración, que debe estar para a próxima primavera. Máis que vir preguntar, a conselleira debería estar a traballar nisto", apuntou.
Igualmente, lembroulle que o que debe facer é aplicar a cláusula de participación pública nos novos desenvolvementos renovables recollida na directiva, "cláusula que se incluíu na mesma grazas ás emendas do PSDEG-PSOE", destacou, apuntando ademais que o PP votou contra esas emendas.
Por último, lamentou que Ángeles Vázquez non aproveitase a visita para interesarse por como avanza "o procedemento de infracción polo incumprimento, por parte da Xunta, dos requisitos de protección ambiental dos espazos protexidos galegos, como a Rede Natura".
