Un total de 50 galegos do exterior benefícianse este curso das bolsas do 'Programa Retorna FP'
A modalidade con máis solicitudes é a de FP Dual a distancia, con 40 admitidos para as 60 prazas ofertadas.
Por E.P. | Santiago de Compostela | 15/09/2024 | Actualizada ás 13:27
Un total de 50 galegos do exterior cursarán a FP este curso mediante as bolsas do 'Programa Retorna FP'. A Consellería de Educación, Ciencia, Universidades e FP publicou a lista de persoas admitidas. Segundo informou a Xunta, en total, recibiron 112 solicitudes, fronte ás 93 da convocatoria anterior, das que 35 foron desestimadas por non presentar a documentación ou non cumprir as condicións requiridas na convocatoria.
A modalidade con máis solicitudes é a de FP Dual a distancia, con 40 admitidos para as 60 prazas ofertadas. Con esta modalidade, os seleccionados poderán iniciar a súa formación académica no país de orixe e completala coa parte práctica en empresas en Galicia. As persoas beneficiadas, con idade comprendidas entre os 17 e os 45 anos, proceden de Arxentina (22), Uruguai (5), Brasil (5), Venezuela (4), Cuba (1), Panamá (1), Australia (1) e Alemaña (1).
Na modalidade para cursar programas específicos básicos de FP, a bolsa é de 6.500 euros por alumno. Os 10 alumnos admitidos realizarán o programa educativo en 'Fontanaría, calefacción, electricidade e telecomunicacións en edificios' que se imparte no CIFP Universidade Laboral de Culleredo. Os beneficiarios, con idades comprendidas entre os 17 e os 44 anos, proceden de Arxentina (6), Uruguai (2), Brasil (1), Cuba (1) e Venezuela (1).
