A dirección do BNG rexeita a moción de censura co PP en Muxía
Anuncia apertura de expedientes a asemblea local do BNG de Muxía.
Por Galicia Confidencial | Lugo | 23/09/2024 | Actualizada ás 20:07
O BNG rexeitou a moción de censura rexistrada este luns contra o alcalde socialista de Muxía, Iago Toba, e que está asinada pola súa única concelleira no municipio da Costa da Morte, Mercé Barrientos, que foi proposta para a apertura dun expediente que deberá ser resolto polo Consello Comarcal da Costa da Morte.
A decisión foi adoptada pola Executiva Nacional do Bloque na súa reunión da tarde deste luns, tras a cal, a formación frontista trasladou que non avalarán "ningunha" moción de censura que implique a participación do PP.
Nacionalistas e populares acordaron a presentación dunha moción de censura contra o socialista Iago Toba para entregar a Alcaldía ao portavoz de Independentes por Muxía, o expatrón maior da confraría de pescadores, Francisco Javier Sar.
A executiva da formación frontista remarca que, na liña dos acordos do Consello Nacional, o seu máximo órgano de dirección entre asembleas, os seus grupos e edís municipais non facilitarán "ningunha moción de censura que implique a participación do PP".
Así, rexeita o paso dado pola súa concelleira en Muxía, proposta para expediente ante o Consello Comarcal da Costa da Morte, aínda que carga contra a actitude "despótica e pouco democrática" do socialista Iago Toba, ao que acusan de xerar "un clima de crispación do que é o único responsable e que en nada beneficia a boa gobernación do concello".
O órgano executivo do Bloque tamén dirixe as súas críticas cara ao PSdeG, aos que responsabilizan de ser "perfectamente coñecedores" desta "actitude de desprezo" cara á oposición do seu alcalde en Muxía e non adoptar "ningunha medida respecto diso".
