Esgotadas en horas as 500 sesións para desfrutar de balnearios ourensáns a 1 euro
Estas sesións poderán gozarse a partir do 28 de setembro ata o 31 de outubro de luns a domingo en distintas franxas horarias e cunha duración de entre unha hora e media e dúas horas, en función do balneario.
Por Europa Press / Redacción | OURENSE | 27/09/2024 | Actualizada ás 19:30
As 500 sesións de balneario a un prezo de 1 euro ofrecidas pola Deputación de Ourense esgotáronse en poucas horas desde a súa posta á venda no expositor do organismo provincial na feira Termatalia. O goberno provincial que encabeza Luís Menor celebrou este venres o "éxito" dunha iniciativa na que participan cinco balnearios con piscinas de augas termais para usos lúdico-terapéuticos (Lais, Cortegada, Lobios, Partovia e Arnoia).
Estas sesións poderán gozarse a partir do 28 de setembro ata o 31 de outubro de luns a domingo en distintas franxas horarias e cunha duración de entre unha hora e media e dúas horas, en función do balneario. A promoción foi posta en marcha pola deputación ourensá con motivo da XXII Feira Internacional do Turismo Termal, Saúde e Benestar (Termatalia).
