A Xunta pon dúas condicións aos concellos galegos para acollerse á bonificación da subida do canon de Sogama
Deberán reducir o 1 % das toneladas que van á bolsa negra ou ben incrementar nun 3 % a reciclaxe.
- O PSdeG esixe á Xunta cubrir o 100% do canon de Sogama: "Rueda contamina, Rueda paga"
- Que hai detrás da suba do canon de SOGAMA?... así cobra a Xunta os seus propios impostos
Por Europa Press / Redacción | SANTIAGO DE COMPOSTELA | 27/09/2024 | Actualizada ás 20:00
Os concellos galegos poderán bonificarse da redución do 60 % da subida do canon do lixo, que asumirá a Xunta, se cumpren dúas condicións: reducir o 1 % das toneladas que van na bolsa negra ou se incrementan nun 3 % a reciclaxe. A conselleira de Medio Ambiente e Cambio Climático, Ángeles Vázquez, reuniuse este venres co presidente da Federación Galega de Municipios e Provincias (Fegamp), Alberto Varela, para informarlle sobre o novo canon de Sogama para o ano 2025.
Tras a reunión e en declaracións aos medios, Ángeles Vázquez indicou que con isto o que buscan é "incrementar as cifras de reciclaxe" na comunidade galega. "Deste xeito, perseguimos, por unha banda, axudarlles desde o punto de vista económico e, doutra banda, axudarnos a todos a coidar o medio ambiente", esgrimiu a conselleira.
Unha vez máis, Vázquez volveu a cargar contra o presidente do Goberno central, Pedro Sánchez, e lembrou que a Xunta propuxo, "en máis dunha ocasión", que se se retiraban os impostos derivados da lei de 2022 "non terían que modificar" o canon. "Como non é así, hai que repercutir eses impostos", criticou.
Para afrontar o cargo, segundo detallou, os concellos terán que pagar 95 euros, aínda que o custo real fosen 108 euros. Ademais, aqueles concellos adheridos a Sogama e que cumpran con algunha das condicións, o custo real nas súas arcas será de 83 euros (aplicado o 60 % da actualización do canon que asume a Xunta).
PRESIDENTE DA FEGAMP
Pola súa banda, o presidente da Fegamp detallou que desde esta reunión teñen "información oficial" e agora deberá de tomar decisións respecto dos números trasladados. "Os concellos estamos nunha situación moi difícil e cada vez con máis gastos e cos ingresos máis mermados. Todo o que supoña novos gastos para os concellos poranos nunha situación moi delicada", lamentou.
