Alexandra Fernández: “En Marea é un espazo en construción que ten as portas abertas”

Tamén fala das vindeiras eleccións autonómicas e, insiste, que as portas de En Marea seguen abertas a outras candidaturas populares e nacionalistas, como Cerna, CxG ou o propio BNG “porque o gran rival é o PP” e pódese “camiñar xuntos”.

Como están as negociacións para que En Marea teña grupo propio no Congreso?
Nós temos falado co PSOE explicándolle que En Marea non é unha suma de partidos senón moito máis. Son 405.000 galegos que queren voz propia no Congreso e para nós, iso, é a cuestión principal. Podemos negociar financiamento dos grupos e os tempos de intervención, pero a cuestión principal para nós é que houbo unha vontade da cidadanía de que houbera un Congreso máis plural e que se entenda a plurinacionalidade no Estado, e que isto ten que estar presente no Congreso.

Por iso, dixémoslle que sería un fraude que un 25% dos galegos non tivera representación no Congreso e criticamos que nos traten de vender a gobernabilidade entre elites, que é polo que avoga o PSOE agora, porque hai outras posibilidades como é a de escoitar á cidadanía. Por iso insistimos que ten que decidir que quere escoller; ou apoiarse na muleta de C's, que parece que vai a esa opción, ou se quere ser valente e volver a ese PSOE socialdemócrata.

Pero os interlocutores do PSOE que vos din?
Pois se negan a entender, de momento, o tema dos catro grupos e para nós é crucial isto. Non entendemos que haxa un goberno co PSOE se non entenden que o que demandou a cidadanía é cambio, un cambio plural.

Entendo que esa demanda é común a  todos os integrantes de en Marea; Anova, EU, as mareas e Podemos, non?
Si, claro. Todos estamos completamente de acordo porque todos compartimos esta posición desde o primeiro momento.

E como interpretas logo as voces que xurdiron estes días en Galicicia coas declaracións do líder de Podemos no país que critica o escoramento ao nacionalismo e apunta a posibilidade de ir en solitario ás autonómicas?
Eu son deputada de En Marea e creo que este tipo de espazos son os máis adecuados para disputarlle o poder ao PP. Sobre o que di Breogán Riobóo... Son discusións que se dan no seo da súa organización. Non nos metemos niso.

Pero non cres que isto abre frontes innecesarias na coalición?

Hoxe demostramos que todos estamos na mesma liña. Que apostamos todos polo mesmo, polas confluencias, porque é a mellor escolla para derrotar ao PP.

Co PSOE semella que tedes dificultade de entendemento, e que tal co resto de grupos de esquerda e cos nacionalistas?
Por agora é unha cuestión aritmética que calquera pacto pasa polo PSOE. Por iso é importante que nos entendamos. Non pode vir con escusas ridículas para, logo, buscar un pacto co PP.

Pero xa hai un pacto co PP?
Todo semella que si.

Entón vai haber gran coalición?
Si, parece que pretende que todo siga igual, nunha gran coalición co PP e Ciudadanos e con apoios mediáticos. Pero nós insistimos que hai posibilidades dun goberno progresista que entenda a plurinacionalidade do Estado.

Con todo, semella que no PSOE hai dous bandos; o de Pedro Sánchez e o de Susana Díaz.  Non cres que aínda hai posibilidades de acordo?
Si. Hai dúas almas diferentes e por iso queremos que o PSOE non pacte co PP e non renuncie aos seus sinais de identidade e axude a construír un novo espazo no que recupere os seus principios socialdemócratas, federalistas e de apoio á plurinacionalidade do Estado. E veremos cara onde camiña; ou cara continuar afondando nas políticas elitistas e privatizadoras do PP ou apostando por alternativa de esquerdas.

E non cres que o que pase en Madrid vai ter resposta en Galicia cun adianto electoral?
Iso está todo no aire pero está claro que nas autonómicas teremos que camiñar nestes espazos porque a suma multiplica e temos que seguir traballando nesta liña, traballando por novos espazos cooperativo e de acumalación de forzas.

Nesa acumulación de forzas da que falas caben novas forzas como mareas, CxG, Cerna o mesmo o  BNG?
En Marea é un espazo en construción con portas abertas e levan abertas desde as municipais porque o gran rival é o PP e podemos camiñar xuntos. Iso espero...

Precisamente ti es de Anova, a parte nacionalista de En Marea. Non cres que isto pode axudar a que haxa entendementos?
Non é cuestión de nacionalismos, senón de que sexamos capaces de aglutinarnos baixo un proxecto común que entenda a capacidade de decidir dos galegas e das galegas.

E supoño que teña como eixo un novo modelo social e defensa da educación ou sanidade pública?
Sí, si claro. Un goberno que pare estas políticas privatizadoras do PP e que blinde o estado de benestar e entenda que Galicia ten especificidades que compre por enriba da mesa, por exemplo,  outro modelo de país e non o do endebedamento do PP. Tamén un novo goberno que aposte pola industrialización e  polos sectores primarios do país.