Yolanda Díaz cualifica a Altri de "aberración ambiental"

A ministra de Traballo e vicepresidenta segunda do Goberno, Yolanda Díaz, cualificou de "aberración ambiental" o proxecto de Altri en Palas de Rei, unha postura que dixo é compartida no Executivo central. En entrevista en Cadea Ser Galicia, criticou o carácter "altamente contaminante" do proxecto e advertiu dos seus efectos negativos sobre a ría de Arousa. Díaz acusou ao Partido Popular galego de situarse "de costas" aos intereses ambientais de Galicia e lembrou que o Goberno vetou a inclusión de Altri nos fondos europeos do PERTE de descarbonización.

A vicepresidenta tamén se referiu á situación en Sargadelos tras os despedimentos na planta de Cervo, cualificándoa de "gravísima" e advertindo ao propietario, Segismundo García, de que debe respectar a legalidade. Díaz reivindicou Sargadelos como proxecto estratéxico e denunciou as trabas á Inspección de Traballo. Sobre a AP-9, defendeu o rescate inmediato da autoestrada, considerando que sería máis económico e instou a que a súa xestión pase á Xunta de Galicia.

No ámbito laboral, Díaz avanzou que o Consello de Ministros aprobará este martes a redución da xornada laboral, que beneficiará a 662.000 galegos, segundo cifras do seu Ministerio. Tamén puxo en valor que Galicia é a cuarta comunidade con máis traballadores superando as 39,5 horas semanais, e anunciou que a próxima medida será o Estatuto dos bolseiros.

En política internacional, a vicepresidenta pediu a rescisión dos contratos de armamento con Israel, ao que cualificou de "país xenocida", e celebrou a rectificación do ministro Marlaska. Defendeu unha política de defensa europea propia e criticou o rearmamento. Por último, tras asistir ao funeral do papa Francisco, destacou o seu compromiso coa paz e xustificou a ausencia de Pedro Sánchez no acto oficial, asegurando que a representación española foi adecuada.