Alertan sobre a "dobre victimización" da muller inmigrante desde a subdelegación do Goberno de Pontevedra

O subdelegado do Goberno en Pontevedra, Abel Losada, alertou este martes sobre a "dobre victimización " que sofren as mulleres inmigrantes.

Abel Losada presidiu este martes unha concentración e minuto de silencio ante a sede gobernativa en repulsa ao crime machista de Fadoua Akkar, unha muller marroquí de 41 anos veciña da parroquia pontevedresa de Salcedo morta a mans da súa parella o pasado sábado en Domaio, en Moaña.

O secretario de Economía e Emprego, Abel Losada. PSDEG

Losada convidou á cidadanía a reflexionar "sobre o que pasaría se o asasinato machista de Fadoua Akkar fose cometido por un cidadán marroquí con antecedentes por violencia de xénero e a muller asasinada fose unha cidadá española". O subdelegado preguntouse "cal sería a reacción da sociedade e dalgunhas forzas políticas?".

Neste sentido, dixo estar "seguro" de que "anteporían o cortoplacismo da discusión sobre a inmigración" fronte ao que, ao seu xuízo é o "feito fundamental" que é "tentar erradicar entre todos que as mulleres sexan asasinadas o feito de selo".

Neste acto de condena tamén participou o alcalde de Pontevedra, Miguel Anxo Fernández Lores, así como membros do goberno local e da Corporación Municipal de Pontevedra, traballadores da Subdelegación, integrantes das Forzas e Corpos de Seguridade do Estado e das Forzas Armadas, entre eles o tenente coronel da Garda Civil de Pontevedra, Óscar Grañas, e o comisario provincial do Corpo Nacional de Policía, Juan José Díaz.

O alcalde de Pontevedra sinalou que coa sucesión de novos crimes machistas "temos que recoñecer que hai un certo fracaso, porque segue incrementándose o número de vítimas".

O rexedor informou que o Concello de Pontevedra puxo en contacto coa familia da vítima para ofrecer toda a axuda que necesiten desde o punto de vista administrativo das competencias municipais, pero que, de momento, non solicitaron ningunha asistencia.

Tamén confirmou o alcalde que o fillo menor de idade da vítima foi acollido pola súa familia en Vilaboa.