Un acusado de abuso sexual a unha discapacitada en Carballo alega que era consentido: "Ela veu para iso"

Dous homes acusados de delito de abuso sexual a unha muller adulta, o 25 de decembro de 2020 no partido xudicial de Carballo, foron xulgados este luns na Audiencia Provincial da Coruña. Enfróntanse a penas de nove e tres anos de prisión, respectivamente. Durante a vista, un dos procesados, ao que se lle piden nove anos, alegou que as relacións foron consentidas. "Ela veu para iso e eu porteime moi ben, xamais lle fixen dano a ninguén", dixo tras insistir en que a muller "se quixo quedar" no domicilio. "Eu non a encerrei, en ningún momento me dixo que quería marcharse da miña casa", puntualizou.

Respecto da discapacidade da vítima, asegurou que "era normal de todo" e "falaba normalmente". Na mesma liña, o outro procesado, que se enfronta a unha pena de tres anos de cárcere, recalcou que "non sabía que estaba enferma". En canto á súa relación con ela, relatou que mantiñan "encontros casuais" nos que ela o "convidaba a un café". Á súa vez, a vítima argumentou durante o xuízo que na casa "estaba todo pechado". "Insistinlle por favor que non me quería quedar alí", sinalou. Ademais, explicou que escoitou a ambos os homes falando dela, "dicindo que non estaba ben da cabeza", e asegurou que un lle deu "diñeiro" ao outro "para que tivese relacións sexuais con el".

Exterior da Audiencia Provincial da Coruña | Fonte: Arquivo