Unha moza denuncia, xa maior de idade, ao padrasto por tocamentos cando tiña 11 anos
Outra menor, amiga da vítima, tamén denuncia ao home por tratar de tocala en dúas ocasións.
Por Europa Press / Redacción | Vigo | 15/10/2024 | Actualizada ás 13:10
Unha moza reafirmou este martes ante a sección quinta da Audiencia Provincial de Pontevedra, con sede en Vigo, que o seu padrasto abusou sexualmente dela cando tiña entre 11 e 12 anos: "Tocoume o peito por baixo da roupa interior".
Así o sinalou na vista levada a cabo esta mañá, durante a cal relatou os feitos que supostamente viviu cando o home era a parella da súa nai e residía con elas. A moza (xa maior de idade) relatou varios momentos vividos xunto ao home, indicando que nunha ocasión, cando estaban a ver a televisión xuntos a soas, el colocouna encima das súas pernas mentres "xogaban a facerse cóxegas" e ela notou unha erección.
Outro día, sempre segundo as súas palabras ante o xuíz, o home, mentres estaban tombados xuntos, baixaría a súa man polo seu corpo ata introducila por baixo da súa roupa ata o seu peito. Tamén nunha ocasión, o padrasto pedíralle un bico na boca para darlle unha funda dun móbil que lle comprou. Ela asegurou que llo deu.
Despois de que a súa nai deixase ao home, ao cal trataba como un pai, e tras falalo cunha amiga, escribiulle unha carta á muller onde lle explicaba o que pasara. A pesar disto, non denunciou nese momento.
Preguntada por que tardou tantos anos en denunciar, ela asegurou que naquel momento non era capaz de facelo, porque psicoloxicamente tiña problemas, por este tema e por outros, indicando mesmo que nalgunha ocasión tratou de quitarse a vida.
Precisamente a amiga da vítima tamén denuncia supostos abusos sexuais sufridos por parte do acusado, que tentou tocarlle os peitos ata en dúas ocasións. Na súa declaración, esta moza (xa maior de idade) indicou que nunha ocasión viu como o home tocaba a perna por baixo da falta da súa amiga, cando ían no coche á volta do colexio.
OITO ANOS DE CÁRCERE
Por todo iso, Fiscalía solicita ata oito anos de cárcere para o acusado. Segundo o escrito do Ministerio Público, os feitos ocorrerían entre 2013 e 2016, cando as dúas mozas tiñan menos de 16 anos. Por eles, acúsase o home de dous delitos de abusos sexuais sobre menores de 16 anos.
Desta maneira, polo primeiro pídese unha pena de 5 anos de cárcere e cinco anos de liberdade vixiada e afastamento sobre a primeira vítima. Polo segundo delito, tres anos de cárcere e liberdade vixiada e afastamento tamén 5 anos sobre a segunda vítima. Ademais, piden que o procesado indemnice á súa fillastra con 3.000 euros e con 1.500 euros á segunda vítima.
CONCLUSIÓNS
Nas súas conclusións finais, Fiscalía acolleuse ás súas peticións, dando credibilidade ás declaracións das denunciantes. Así mesmo, indicou que "nada poden obter" agora, tantos anos despois, desta acusación, "só inconvenientes". Así, defende que a pesar de atoparse "incoherencias nas datas", todas as declaracións son "inalterables no esencial".
Pola súa banda, o avogado do home pediu a libre absolución do procesado, insistindo en que as palabras das supostas vítimas están "cheas de incoherencias", apuntando a que a pesar de existir "unha liña sólida sobre os feitos", en todo o "accesorio" non a hai.
