Asime apunta que o Goberno prevé que un 43 % da superficie de parques eólicos mariños do Estado estea en Galicia
Pide que o 30 % actual de puntuación se incremente para conseguir unha maior creación de empregos.
Por Europa Press / Redacción | SANTIAGO | 17/10/2024 | Actualizada ás 18:43
O secretario xeral de GOE-Asime, Enrique Mallón, reclamou que "se teña máis en conta o impacto económico e social" e que, por iso, "deben ter unha alta valoración e unha alta puntuación", os proxectos de eólica mariña a desenvolver nas costas galegas, para que desta forma "teña un maior peso a cadea de valor local", manifestacións realizadas tras aprobarse recentemente o regulamento que permitirá estas instalacións no mar.
"Cremos que os proxectos que se implanten nas costas españolas e nas costas galegas, deben de ter unha alta valoración e unha alta puntuación", considera, polo que anima a administracións públicas e ao Goberno de España a que nas próximas poxas que se abran, ese 30 % de puntuación que se está valorando actualmente, "sexa maior". Ditas manifestacións realizounas Mallón no mediodía deste xoves nas instalacións do CIS-Galicia en Ferrol, onde se presentou a VII edición do congreso internacional GOinterHUB, que reunirá nestas mesmas instalacións os días 24 e 25 de outubro a máis de 500 participantes.
Enrique Mallón abundou en que, desde o seu punto de vista, a Unión Europea (UE) debe ter "moi en conta" que nas cimentacións a industria do norte de Galicia e de España, "teña un protagonismo especial, unha cadea de valor sólida, única a nivel practicamente mundial", xa que segundo el "débese de promocionar e potenciar, nas poxas, nos concursos, nas regulamentacións, que esa cimentación proveña de produtos fabricados por empresas europeas". Tamén animou a "apostar polas cimentacións fabricadas en aceiro, en metal", xa que iso supón a implicación de "máis de 200 empresas implicadas, máis de 3.000 empregos directos actualmente en Galicia", que segundo Mallón "non teñen outros produtos como puidese ser o formigón ou calquera outro".
EN GALICIA
O secretario xeral de Asime tamén detallou que o Goberno central prevé que un 43 % da superficie de parques eólicos do total do Estado estea en Galicia, "nas costas galegas, e iso obviamente é unha vantaxe competitiva enorme, e se nos aproveitamos desa posible implantación, poderiamos chegar aos 5.000 empregos directos novos, que se sumarían a eses 3.000 xa existentes, ata chegar así aos 8.000 postos de traballo directos en Galicia". Mallón lembrou que na actualidade dos cinco parques eólicos mariños flotantes que hai Europa, "tres deles teñen tecnoloxía galega".
CONGRESO
En canto ao congreso programado para dentro duns días en Ferrol, Mallón apuntou que participan o supercluster Atlantic Wind, o supercluster español do norte de España, e tamén van estar organizacións como a Asociación Eólica de Galicia e Wind Europe, ademais da Organización Eólica Mariña de Alemaña, tamén a Asociación Eólica de Xapón. "Nestes dous casos e tamén no caso de Irlanda do Norte, vai ser a primeira vez na historia que están aquí en Galicia os representantes destes clústeres empresariais e industriais", destacou.
Tamén haberá representantes de Navantia e Windar, "como os representantes da cadea de valor principal aquí en Galicia", xunto a promotores como Iberdrola, os portos de Ferrol-San Cibrao, A Coruña, Xixón e Avilés, e tendencias tecnolóxicas representadas por Principal Power, "que é unha empresa que xa está a desenvolver proxectos en Portugal", e Breixo Energy, "que tamén teñen experiencia neste sistema, sobre todo técnicos e tecnolóxicos".
