Atendidasa 55 persoas por 45 accidentes de tráfico durante o fin de semana
Por E.P. | SANTIAGO DE COMPOSTELA | 21/10/2024 | Actualizada ás 11:11
Urxencias Sanitarias de Galicia-061 asistiu durante o fin de semana a un total de 55 persoas debido a 45 accidentes de tráfico ocorridos nas estradas galegas. O período contabilizado comprende desde as 15,00 horas do venres, 18 de outubro, ata as 23,59 horas do domingo, 20 de outubro.
Segundo informou a Fundación Pública Urxencias Sanitarias de Galicia-061, o sábado foi o día que rexistrou máis sinistros, con 21 accidentes de tráfico. A Central de Coordinación do 061, que xestiona e coordina os servizos prehospitalarios en casos de urxencia e emerxencia en Galicia, recibiu nestes días 60 chamadas en relación cos accidentes de tráfico.
Estas alertas xeraron 45 asistencias sanitarias por parte do persoal do 061 que atendeu un total de 55 persoas. A proporción de homes e mulleres atendidos foi do 53% e do 47% respectivamente. Nas idades dos feridos, obsérvanse que o 34% dos atendidos tiña entre 15 e 29 anos.
Por provincias, Pontevedra foi a que máis sinistros rexistrou, con 27 accidentes de tráfico durante os desprazamentos destas datas. Por detrás situouse A Coruña, con nove; Ourense, con cinco; e Lugo, con catro.
Os recursos sanitarios mobilizados polos médicos que atenderon as chamadas na Central de Coordinación do 061 foron 48. Así, as ambulancias asistenciais de soporte vital avanzado asistiron en seis accidentes, as ambulancias de soporte vital básico en 41 e os equipos sanitarios de Atención Primaria que completan a dotación das ambulancias asistenciais de soporte vital básico do 061, no caso de necesitalo, prestaron asistencia sanitaria nun accidente.
