O PSOE sobe ata o 34 % en estimación de voto, pero o PP recorta a vantaxe, cun BNG que se mantén no 0,8 %

O Barómetro de Opinión realizado polo Centro de Investigacións Sociolóxicas (CIS) neste mes de outubro volve situar ao PSOE na cabeza, subindo un punto ata o 34 % de estimación de voto, pero o PP crece máis no último mes e chega ao 31,5 %, recortando a 2,5 puntos a vantaxe dos socialistas.

A caída sófrena o resto de formacións políticas de ámbito estatal, fundamentalmente Sumar, que marca o seu mínimo histórico cun 6,3 %, pero tamén Vox e a plataforma de 'Alvise' Pérez, con 11,8 e 1,7 % respectivamente. Podemos baixa tres décimas ata o 3,3 %. O BNG mantense no 0,8 %, idéntica porcentaxe de estimación de voto (en porcentaxe sobre voto válido) ao do barómetro de setembro.

MARGARITA ROBLES E CARLOS CUERPO, ÚNICOS MINISTROS QUE APROBAN

Ademais, a titular de Defensa, Margarita Robles, e o titular de Economía, Carlos Cuerpo, son os dous ministros mellor valorados polos españois e os únicos que aproban, mentres que o titular de Transportes, Óscar Puente, repite como o peor valorado do Executivo, segundo o barómetro realizado en outubro polo Centro de Investigacións Sociolóxicas (CIS).

Nesta ocasión, o primeiro posto levouno a ministra de Defensa cunha nota media de 5,09 puntos, seguida de Cuerpo, que queda nun 5,08. Ambos baixaron a súa nota con relación ao mes de xullo, no que Cuerpo obtivo 5,22 e Robles un 5,13. A medalla de bronce vai para a ministra de Transición Ecolóxica, Teresa Ribera, que queda no top tres do podio cun 4,54 de nota media pola súa xestión á fronte do ministerio. A súa presenza no Goberno ten data de caducidade se finalmente é elixida vicepresidenta da Comisión Europea.

PRIMEIRO BARÓMETRO DE ÓSCAR LÓPEZ

No lado oposto, como os peores valorados volven tamén a repetir posicións o ministro Puente, a quen os enquisados outorgan un 3,62 de nota, seguido do ministro de Interior, Fernando Grande-Marlaska, cun 3,74. Unhas valoracións que tamén baixan con respecto ao mes de xullo onde obtiveron un 3,79 e un 3,86 respectivamente. Este barómetro é, ademais, o primeiro desde a chegada ao Executivo do que fora xefe de Gabinete de Sánchez, agora ministro de Transformación Dixital e Función Pública, Óscar López, tras o nomeamento de José Luís Escrivá como gobernador do Banco de España. López estréase á fronte da súa carteira cun 4,05 de nota media por parte dos españois, situándose así como o terceiro ministro peor valorado por enriba de Puente e Marlaska.

Entre medias sitúanse o resto dos membros do Executivo, entre eles o propio presidente Pedro Sánchez, a quen os enquisados outorgan un 4,13 de nota media, e tamén a líder de Sumar no Goberno, Yolanda Díaz, que queda lonxe do aprobado cun 4,22 pola súa xestión ministerial. Iso si, o barómetro reflicte un descoñecemento xeneralizado do Goberno de coalición. Ata doce ministros son descoñecidos pola maioría dos entrevistados, o que pode pór en cuestión a valoración.

MINISTROS QUE NON COÑECEN 8 DE CADA 10 ENQUISADOS

Carlos Cuerpo, a pesar de ter a segunda mellor nota, é un descoñecido para tres de cada catro enquisados. Pero hai outros membros do Goberno que ofrecen peores cifras de coñecemento na sociedade, a poucas semanas de cumprirse un ano da formación do Executivo. A ministra de Seguridade Social, Elma Saiz, só é coñecida por un de cada dez enquisados. Sira Rego, responsable de Infancia e Mocidade e representante de Esquerda Unida (Sumar), ten un nivel de coñecemento do 15,2 % e o seu compañeiro de Sumar Pablo Bustinduy, ministro de Dereitos Sociais, só chega ao 21 %.

Entre os socialistas, destacan tamén os casos de Diana Morant, ministra de Ciencia e líder dos socialistas valencianos, á que só coñece o 20 % dos entrevistas, ou do expresidente canario Ángel Víctor Torres, titular de Política Territorial e quen leva a voz do Goberno na crise migratoria, cuxa identidade descoñece o 78,8 % das persoas consultadas polo CIS. Ademais, tres de cada catro non coñecen nin a Jordi Hereu (Industria), nin a Ana Redondo, (Igualdade), e dous terzos non saben quen é o ministro Óscar López (Transformación Dixital) nin Isabel Rodríguez (Vivenda). A propia Portavoz do Goberno e ministra de Educación, Pilar Alegría, que cada semana dá conta dos acordos do Consello de Ministros, é unha descoñecida para a metade dos enquisados.