Os artesáns Aitor Martínez, Julia de la Cal e Santiago Besteiro competirán polo Premio Artesanía de Galicia 2024
O galardón está dotado con 9.000 euros e darase a coñecer nun acto público que se celebrará no mes de decembro, xunto cos gañadores das outras dúas categorías, o Premio Traxectoria e o tres Bolsas Eloy Xesto
Por E.P. | SANTIAGO DE COMPOSTELA | 25/10/2024 | Actualizada ás 14:29
Aitor Martínez, Julia de la Cal e Santiago Besteiro competirán polo Premio Artesanía de Galicia 2024, segundo informou a Xunta tras presidir o director xeral de Comercio e Consumo a reunión do xurado destes galardóns.
Os mesmos buscan estimular a creatividade dos artesáns galegos, recoñecer a súa traxectoria e incentivalos a mellorar, con especial atención ás novas xeracións.
O galardón está dotado con 9.000 euros e darase a coñecer nun acto público que se celebrará no mes de decembro, xunto cos gañadores das outras dúas categorías, o Premio Traxectoria e o tres Bolsas Eloy Xesto.
Nesta ocasión, os seleccionados para o Premio Artesanía foron o torneiro Aitor Martínez (Tomiño), a cesteira Julia de la Cal, do taller A Parabólica (O Porriño), e Santiago Besteiro (Monterroso), especializado no traballo do coiro.
