Localizado no Porriño o veciño de Eivissa ao que perderon a pista no Porto, onde comezaba o Camiño
Por Europa Press / Redacción | SANTIAGO DE COMPOSTELA | 27/10/2024 | Actualizada ás 11:32
A Policía Local do Porriño localizou a Jesús Saura Ortiz, o veciño de Eivissa de 58 anos que levaba desaparecido desde o pasado martes, cando lle perderon a pista no Porto, onde ía iniciar o Camiño de Santiago.
Segundo informou a policía local, o home foi identificado por uns veciños nunha rúa do municipio pontevedrés que o recoñeceron pola alerta de procura emitida na plataforma SOS Desaparecidos. Foron estas persoas as que o acompañaron á comisaría local para que recibise atención.
Unha vez en dependencias policiais, activáronse os protocolos pertinentes e verificáronse os detalles da desaparición. Tras realizar xestións para confirmar se existía unha denuncia oficial, SOS Desaparecidos corroborou que se trataba da persoa que a súa familia reportase como desaparecida días atrás.
O fillo, que se desprazou ao Porto para participar na procura, trasladouse inmediatamente ao Porriño para reencontrarse con el.
O home iniciara o Camiño de Santiago desde O Porto xunto a un grupo de persoas e un párroco da súa illa, pero desde o martes perdéranlle o rastro. Ao parecer, aquel día tomou un ritmo máis pausado que o resto do grupo e perdeu contacto telefónico despois de ser vítima dun roubo no que lle subtraeron todas as súas pertenzas.
