Continúa o plan de intervencións arqueolóxicas no Castro de Cameixa no Concello de Boborás
A actuación enmárcanse no Plan de intervencións arqueolóxicas da Consellería de Cultura, que neste ano contempla un total de 32 accións en 30 concellos de todo o territorio
Por E.P. | OURENSE | 28/10/2024 | Actualizada ás 19:16
O delegado territorial da Xunta en Ourense, Manuel Pardo, desprazouse este luns ao concello ourensán de Boborás para, da man da súa alcaldesa, Patricia Torres, supervisar o comezo dos novos traballos de consolidación e acondicionamento no Castro de Cameixa, co obxectivo de ampliar a súa investigación e revalorización.
A actuación enmárcanse no Plan de intervencións arqueolóxicas da Consellería de Cultura, que neste ano contempla un total de 32 accións en 30 concellos de todo o territorio. Manuel Pardo explicou que, cun orzamento de 17.300 euros, estas tarefas dan continuidade ás campañas anteriores, realizadas desde 2018, para favorecer a posta en valor deste sitio histórico de obrigada referencia na bibliografía especializada, porque permitiu reformular os distintos períodos da cultura castrexa.
Así, con esta nova actuación, o Goberno galego leva investido ata o momento no xacemento máis de 75.000 euros. Os labores, cun período estimado de 15 días, concéntranse en limpezas e roza de vexetación da contorna, na diagnose do estado de conservación e na consolidación dos restos arqueolóxicos descubertos.
Ademais, tamén se fará un levantamento topográfico en tres dimensións da área de actuación e un debuxo das estruturas exhumadas. Todo isto complétase coa recollida de mostras e documentación gráfica.
INTERVENCIÓNS NA PROVINCIA
Na provincia de Ourense, con oito acciones en 10 localidades, o Goberno galego colabora cos concellos na recuperación patrimonial da Cibdá de Armea en Allariz, un xacemento castrexo romanizado no que se está intervindo, e na posta en valor do antigo mosteiro de San Xoán de Camba en Castro Caldelas, con labores que están aínda por comezar.
Tamén na revalorización da cámara megalítica e a súa túmulo na mámoa 1 da Veiga de Maus Salas, en Muíños. Ademais, este verán levou a cabo a limpeza e roza de vexetación nos castelos da Limia, titularidade da Xunta, un conxunto composto pola Torre do Castro, no concello de Sandiás, o Castelo da Pena, en Xinzo de Limia, e a torre de Firbeda, en Porqueira.
A estes proxectos, súmanse os traballos de escavación e conservación previstos no Castro de San Vicenzo; en Beariz, a escavación e consolidación articulada sobre o Castro de Garfián; en Boborás, a actuación contemplada no Castro de Cameixa, e, en Nogueira de Ramuín, varios procesos en execución que teñen que ver co mosteiro de Santo Estevo de Ribas de Sil, coa paraxe de Santa Baia e coa capela de San Miguel de Canle.
A Consellería de Cultura, Lingua e Mocidade fai un investimento total no Plan de intervencións arqueolóxicas 2024 de 551.162 euros, destinando á provincia de Ourense 166.400 euros.
