O exalcalde Jesús Vázquez recuperado para a xestora local, na que Marisol Díaz será secretaria
Por Europa Press / Redacción | OURENSE | 30/10/2024 | Actualizada ás 10:34
A sede do PP de Ourense acolleu unha nova reunión da xestora local na cidade, que preside Vitoria Núñez, a quen acompañou o presidente provincial da formación, Luís Menor. Nesta convocatoria, segundo informou a formación nun comunicado, anunciouse "o reforzo" deste órgano coa incorporación como secretaria de Marisol Díaz, actual directora xeral de Patrimonio Natural da Xunta.
Luís Menor lembrou que, durante o período de vixencia da xestora provincial, tamén se adoptou un acordo similar, co nomeamento de Sandra Quintas como secretaria, axudando así a "fortalecer o labor da xestora".
Neste sentido, Luís Menor pediu aos representantes populares na cidade "o maior dos esforzos" para trasladar á cidadanía "o auténtico compromiso por Ourense que o Goberno galego transforma en realidades", en alusión aos 12 compromisos para a capital que subscribiu co líder do PPdeG, Alfonso Rueda, durante a campaña das autonómicas de febreiro.
Vitoria Núñez, pola súa banda, destacou que, coa incorporación de Marisol Díaz á secretaría da xestora local, increméntase "a capacidade de coordinación e de traballo". Tamén anunciou que a listaxe da xestora local, que supera a vintena de membros, amplíase con outro cinco caras, entre elas a do exalcalde Jesús Vázquez. Súmanse tamén o parlamentario autonómico Juan Casar; a ex directora xeral de Familia, Amparo González; María José Menor, presidenta do Colexio de Enfermaría de Ourense; e Manuel Tejada, profesional do ámbito xudicial.
