Salvan a vida a un veciño en Ponte Caldelas ao practicarlle un RCP
O afectado atópase na UCI do Hospital Montecelo, pero "evoluciona favorablemente".
Por Europa Press / Redacción | Pontevedra | 31/10/2024 | Actualizada ás 13:00
Un cidadán e unha axente da Garda Civil salvaron a vida a un veciño de Ponte Caldelas (Pontevedra) ao que practicaron unha reanimación cardiopulmonar (RCP) o pasado 26 de setembro.
Segundo informa o Instituto Armado, aquel día unha patrulla da Compañía da Plana Maior da Comandancia de Pontevedra, de servizo de condución de presos, pasou polo lugar de Cuñas e observou unha aglomeración de xente ao redor dunha persoa tendida no chan. Nese momento, un cidadán estaba a lle practicar una RCP, pero ante a grave situación a patrulla da Garda Civil parou o vehículo e unha axente deulle a substitución e continuou a manobra ata que chegou unha ambulancia medicalizada.
Pasados uns días, tiveron coñecemento de que a persoa auxiliada estaba ingresada na unidade de coidados intensivos (UCI) do Hospital Montecelo de Pontevedra e que "evoluciona favorablemente", tal e como informa a Garda Civil.
A médica asistencial do 061 agradeceu "como profesional e cidadá" a atención que lle prestaron: "Non soamente salvaron a súa vida, senón que grazas a eles este cidadán pode continuar facendo unha vida absolutamente normal".
A Garda Civil considera de gran importancia os cursos que se imparten aos seus axentes e que inclúen técnicas de reanimación cardiorrespiratoria, de soporte vital básico (SVB), o uso de desfibriladores e prácticas de primeiros auxilios.
