Tenta matar á súa parella prendéndolle lume: Fiscalía pide 12 anos de prisión

O Ministerio Fiscal pide 12 anos de prisión para un veciño da Estrada acusado de tentar matar á súa parella prendéndolle lume no ano 2023. O caso xulgarase o vindeiro 12 de novembro na Audiencia Provincial de Pontevedra. Segundo a Fiscalía, a parella mantiña unha relación de máis de 12 anos, pero a violencia e os celos esaxerados do acusado acabaron deteriorando a convivencia.

Os feitos aconteceron na madrugada do 23 de setembro de 2023, cando o acusado, provisto dunha garrafa de gasolina, vertiu o combustible fronte á porta do dormitorio da súa parella, á que ameazou de morte. Durante o intento de fuxida da vítima, o home tentou impedilo, golpeándoa cunha puñada e vertendo gasolina polas escaleiras interiores da casa, chegando a prender lume. A pesar do risco, o lume autoextinguíuse debido á pouca cantidade de combustible.

A vítima conseguiu escapar ao exterior e, ese mesmo día, interpuxo denuncia polos feitos. O acusado foi detido e, inicialmente, permaneceu en prisión provisional. Despois de varios cambios na súa situación legal, finalmente, en maio de 2024, a Audiencia Provincial decretou novamente o seu ingreso en prisión sen fianza.

A Fiscalía cualifica os feitos como un intento de asasinato con incendio, con agravante de discriminación por razón de xénero, e solicita para o acusado 12 anos de prisión. Ademais, piden que se lle impoña a prohibición de achegarse á vítima durante 22 anos, así como a indemnización pola lesións sufridas e danos morais.