Milleiros de persoas piden "vivir en galego" tras os informes da dramática situación da lingua

Membros de colectivos políticos, sindicais e asociacións de diferente índole, entre outros, concentráronse este domingo na compostelá Praza da Quintana para denunciar a "emerxencia lingüística extrema" que aseguran vive o galego.

Convocada pola Plataforma Queremos Galego --que agrupa a 600 colectivos sociais--, a concentración, cuxo lema era 'Mudemos ou rumbo. Polo futuro do galego', desenvolveuse desde as 12.00 horas na Praza da Quintana, onde se leu unha declaración unitaria asinada por 167 colectivos "de moi diferente tipo".

En declaracións aos medios antes de iniciar a protesta, o portavoz da plataforma convocante, Marcos Maceira, asegurou que "é posible reverter a situación con implicación de toda a sociedade galega". "Os datos que se fixeron públicos do Instituto Galego de Estatística evidencian unha vez máis o estado de emerxencia lingüística extrema no que está a lingua galega", lamentou.

Así mesmo, avanzou a convocatoria para o próximo 23 de febreiro doutra mobilización, nesta ocasión, na Praza do Obradoiro.

Manifestación de Queremos Galego | Fonte: EP