A Mesa só negociará coa Xunta o Plan Xeral de Normalización se se ofrecen "garantías mínimas"

A Mesa pola Normalización Lingüística insistiu en que só participará no proceso do novo Plan Xeral de Normalización da Lingua Galega se este ofrece "garantías mínimas". Así o comunicaron en resposta á solicitude de reunión enviada en nome da Comisión Técnica da Renovación do Plan.

Nun comunicado explican que o presidente da Mesa, Marcos Maceira, e a secretaria xeral da entidade, Celia Armas, escribíronlle ao coordinador desta comisión, Manuel González, unha carta na que "lamentan profundamente" que a Xunta continúe traballando "contra calquera oficialidade real do galego".

Así as cousas, reiteran a súa vontade de participar en calquera proceso que teña como finalidade reverter a situación de emerxencia lingüística, sempre que se garantan unhas condicións mínimas que aseguren a súa eficacia. Maceira e Armas destacan que comparten co académico una mesma vontade: "favorecer a existencia de acordos reais que garantan uns mínimos para a lingua".

Con todo, consideran "decepcionante" que González "lexitime" coa súa presenza unhas comisións "que se demostraron inoperativas, excluíntes e opacas". Para a organización, o proceso debe ser "transparente, amplo, plural e participativo" e "ter como obxectivo claro avanzar na normalización do galego".

Así mesmo, ven "imprescindible" volver á situación lexislativa anterior ao anuncio da formación de comisións do PXNLG e, por tanto, á anulación da Lei de medios públicos de Galicia que permite o uso de linguas diferentes á galega na CRTVG (futura CSAG); a modificación dos contratos dos campamentos de verán que non contemplan o coñecemento de galego polo persoal contratado; e a revisión da Lei de Intelixencia artificial para a inclusión das emendas que aseguren a oferta e uso do galego por parte da administración.

"Mentres esta situación non se produza, non imos permanecer á espera", advirten. "Participaremos activamente, xunto a moitas outras entidades de todos os ámbitos, no proceso social 'Lingua Vital' anunciado pola plataforma cidadá Queremos Galego e que busca desenvolver o traballo ao que a Xunta e as comisións dirixidas por ela renuncian a facer: propor accións para o desenvolvemento real do PXNLG e dos acordos a favor do galego, avaliándoos e indicando os obstáculos que existiron para a súa aplicación", aseguran.

O presidente da Mesa pola Normalización Lingüística, Marcos Maceira, en rolda de prensa.. MESA POLA NORMALIZACIÓN LINGÜÍSTICA