O Plan Xeral de Normalización da Lingua Galega pode estar listo en novembro, di López Campos
O conselleiro de Lingua espera que así se poida iniciar en 2026 o proceso de negociación política para alcanzar o "demandado" acordo
Por Europa Press / Redacción | SANTIAGO DE COMPOSTELA | 01/04/2025 | Actualizada ás 18:53
O conselleiro de Cultura, Lingua e Xuventude, José López Campos, reuniuse este martes con membros das comisións de renovación do Plan Xeral de Normalización da Lingua Galega, cuxo documento de referencia espera que estea finalizado en novembro deste ano.
En declaracións aos medios antes de presidir a reunión, explicou que este encontro se enmarca no obxectivo marcado polo departamento de facer xornadas de traballo cada dous meses "para pór en común todo o proceso que se está levando a cabo".
"É importante manter esas sustancias de coordinación e eu creo que hoxe se debe agradecer enormemente o traballo que se está facendo. Cando acabemos este mes de abril serán máis de 100 as entidades consultadas no proceso de participación social", avanzou.
Sobre isto, insistiu en que "de nada vale que exista un acordo político se non existe un social". E neste caso, sinalou, "a mellor maneira de chegar a ese acordo é cun proceso de escoita de todas as entidades que teñen certa relevancia no ámbito da lingua". O obxectivo, continuou, "continuar ensanchando a base social da lingua".
Aínda incidindo en que as competencias dos máis novos "están máis que demostradas", recoñece que hai que mellorar os usos e competencias sociais. "E para iso a mellor ferramenta que podemos ter á nosa disposición é o plan xeral porque establece todas as políticas que temos que pór en marcha nos próximos anos, pero tamén esixe os recursos necesarios para implementalas", defendeu.
Confía no traballo do equipo de máis de 130 profesionais que considera que será capaz de conseguir "unha estratexia, un documento e, sobre todo, un compromiso por parte de toda a sociedade, das institucións, para que o galego siga tendo un uso social cada vez máis relevante e importante; é un tema de prestixio".
José López aspira a contar co documento no mes de novembro, cumprindo así o compromiso de conseguilo antes de que acabe 2025, para "poder arrincar 2026 cun proceso novo de negociación política para conseguir ese esperado, ansiado e demandado acordo".
