A fin de semana remata con 51 persoas feridas en 39 accidentes de tráfico

Urxencias Sanitarias de Galicia-061 asistiu durante o fin de semana a un total de 51 persoas, das cales unha faleceu, debido a 39 accidentes de tráfico ocorridos en estradas da Comunidade. Segundo informa a Xunta nun comunicado, en base ás cifras que van desde as 15.00 do venres e as 23.59 do domingo, o sábado foi o día en que se contabilizaron máis sinistros, con 14. Durante este pasado fin, a central do 061 recibiu 47 chamadas en relación con accidentes de tráfico que xeraron 39 asistencias sanitarias, cun total de 51 persoas afectadas. De todas elas, o 62 % foron homes e o 38 % restante, mulleres. En canto ás idades dos feridos, o 30 % tiña entre 15 e 29 anos.

Pontevedra foi a provincia onde máis sinistros se produciron, con 14, seguida da Coruña e Ourense, con nove cada unha. En Lugo houbo sete. Para todos os accidentes, o 061 mobilizou 48 recursos: as ambulancias de soporte vital avanzado acudiron en catro sinistros, o helicóptero medicalizado nun, as ambulancias de soporte vital básico en 41 e os equipos de atención primaria que completan as dotacións fixérono en dúas. En 44 casos os feridos foron trasladados a centros sanitarios, en seis atendeuse no lugar do accidente e unha persoa faleceu no propio lugar.

AUMENTARÁN OS ESFORZOS EN TAREFAS PREVENTIVAS, CON MÁIS SANCIÓNS

O delegado do Goberno en Galicia, Pedro Blanco, anunciou que se aumentarán os esforzos en tarefas preventivas, "que teñen tamén unha parte sancionadora" ante o incremento rexistrado este ano de vítimas en accidentes nas estradas galegas. Así o expuxo no acto de conmemoración do Día Mundial en recordo das vítimas de accidentes de tráfico, ante a Delegación do Goberno, na Coruña. Antes de gardar un minuto de silencio polos falecidos e as persoas feridas, Blanco cualificou de "cifras inasumibles" os datos recolleitos pola Dirección Xeral de Tráfico (DGT) en Galicia, que apuntan a 82 persoas falecidas en sinistros ata este luns.

Por iso, na súa intervención, o delegado realizou un chamamento á responsabilidade e á prudencia da poboación no uso das estradas, indicando que 25 dos falecidos este ano foron debidos a colisións frontais e que o 17 % dos condutores mortos non facían uso do cinto de seguridade. Ademais, puxo o foco nas persoas vulnerables (motoristas, ciclistas e peóns) que representan o 47 % das vítimas mortais. Dentro deste colectivo, destacou o aumento de motociclistas falecidos, que este ano suman 22 fronte aos 13 do pasado.

"UN PROBLEMA QUE NON PODEMOS ACEPTAR"

No acto homenaxe ás vítimas participou tamén a subdelegada do Goberno na Coruña, María Rivas; a xefa provincial de Tráfico da Coruña, Vitoria Gómez; e a delegada en Galicia de Stop Accidentes, Jeanne Picard. Na súa intervención, Gómez recalcou "a enorme escala do problema e o impacto na sociedade" ao lembrar os 1.145 falecidos en sinistros de tráfico en España en 2023, 88 en Galicia. "Segue sendo un importante problema de saúde pública co que non podemos aceptar que haxa que convivir con algo normal e insuperable", lamentou. Nesta liña, Picard instou "aos que nos gobernan" a tomar decisións para eliminar a "delincuencia viaria e os comportamentos violentos no tráfico" e pediu aos lexisladores suprimir a palabra imprudente no código penal cando se refire a un homicidio no tráfico. "Se cometen un delito fano a propósito do dano que vai causar".