Antes de final de ano a Xunta aprobará a oferta de emprego público da administración xeral con 593 prazas de acceso libre

O conselleiro de Facenda e Administración Pública, Miguel Corgos, anunciou que antes de finais deste ano a Xunta aprobará a oferta de emprego público da administración xeral para 2024 con 593 novas prazas de acceso libre. Así o trasladou durante a súa intervención no pleno do Parlamento que este luns acolle o debate de totalidade do proxecto de lei de orzamentos e a norma que o acompaña, a relativa a medidas fiscais e administrativas.

Corgos destacou que a modernización da administración pública e a substitución xeracional están entre "as prioridades do Goberno galego", para prestar un mellor servizo á cidadanía, "con empregados públicos que dean resposta aos retos do século XXI". No seu discurso, reiterou, como vén facendo desde a súa presentación, que as contas públicas para 2025 están elaboradas "con rigor e prudencia", e reivindicou a "estabilidade institucional" para achegar "certidumbres" a familias e empresas.

Resaltou, ademais, a "boa evolución" da economía galega, que encadea "xa" cinco anos de crecemento. No apartado do mercado laboral, apuntou que a Xunta espera que en 2025 se alcance tamén un lustro creando emprego. O orzamento galego para o próximo exercicio ascende a 13.954 millóns de euros e o titular de Facenda lembrou, entre outras cuestións, o "paquete de medidas fiscais" para "reforzar a aposta" pola vivenda. En todo caso, non profundou nesta e outras medidas, ás que si fixo mención, posto que esta sesión do pleno abordará de maneira diferenciada o debate sobre a lei de medidas fiscais e administrativas, a que acompaña aos orzamentos.

A OPOSICIÓN PIDE "RESETEAR" OS ORZAMENTOS PORQUE BENEFICIAN AOS RICOS

Os grupos da oposición no Parlamento, BNG e PSdeG, pediron "resetear" os orzamentos da Xunta para 2025, ao considerar que benefician ás construtoras, as concesionarias das autoestradas e as grandes fortunas. Con todo, o PP, coa maioría na Cámara, rexeitou as emendas de devolución do proxecto, que prosegue o seu debate de totalidade.

Pola súa banda, a portavoz nacional do BNG, Ana Pontón, tachou os orzamentos de "antisociais" e fixo fincapé en que "fomentan a especulación" en materia de vivenda. Así mesmo, censurou que "anuncian investimentos que son unha auténtica farsa" e considerou que a "aposta" pola vivenda é "un tema que vai por modas". "Tras 15 anos dinamitando esta política, o presidente ausente quere convencer de que están preocupadísimos" por este asunto, ironizou.

ANA PONTÓN: "O FUROR PRIVATIZADOR DO PP NON TEN LÍMITES"

Ademais, advertiu de que "o furor privatizador do PP non ten límites" e agora "queren que se faga negocio co dereito das mulleres cun tema como a protección das vítimas". Respecto diso, asegurou que os "centros de crise estarán xestionados por dúas multinacionais: OHL, unha das maiores construtoras do planeta e Eulen". "Sóalles? É a empresa que dirixe en Galicia a irmá do señor Feijóo (...). Xa sabemos por que teñen tanto medo á comisión de investigación e por que vetan a comparecencia de Feijóo e a súa irmá para investigar os chanchullos do PP", criticou.

Viu "surrealista" Pontón, tamén, que o conselleiro insista en que a Galicia non lle interesa unha quita da débeda e recriminou a modificación de "case 50 normas" a través da lei de acompañamento, "a maioría" cuestións que afectan o desenvolvemento eólico coas que "seguen pondo alfombra vermella ao lobby eléctrico". Por último, interrogou aos populares sobre "por que ese odio ao galego" e instoulles a que "como mínimo", xa que "non aceptan resetear os orzamentos", acepten "algunha das propostas" coas que os nacionalistas expoñen "que se reorienten" 1.937 millóns das contas públicas e coas que pretenden que se aplique "unha política fiscal xusta".

BESTEIRO: "GALICIA ESTÁ NUNHA EMERXENCIA LINGÜÍSTICA E HABITACIONAL"

Na súa intervención, o secretario xeral do PSdeG, José Ramón Gómez Besteiro, atribuíu á Xunta ausencia de "impulso propio" e reprochoulle estar "sometida a unha estratexia do partido ditada" desde Madrid. Nun escenario de "emerxencia lingüística", pediu garantir a lingua tamén desde o financiamento, e reclamou máis recursos para os concellos.

A vivenda é, para os socialistas, "un dereito non garantido" na comunidade, polo que demandou unha intervención "decidida" fronte á "emerxencia habitacional". Na súa quenda, Besteiro tamén avisou de profesionais "saturados" e un sistema sanitario "con gretas" e botou en falta "unha decidida aposta polos recursos humanos e materiais en educación". Con estes orzamentos, tanto para Pontón como para Besteiro, benefíciase ás construtoras e ás concesionarias de autoestradas, así como a grandes patrimonios.

"PIRUETAS"

Na réplica, o conselleiro valorou que o proxecto de lei de orzamentos é "ambicioso" e reivindicou unha "liña de execución histórica". Á oposición atribuíulle algunha "pirueta" coas súas críticas e negou facer "favores" aos bancos coa débeda. Pola súa banda, o portavoz do PP, Alberto Pazos, reprochou a BNG e PSdeG "a súa incapacidade para a autocrítica" e preguntouse "como é posible tanta soberbia", ademais de afear a súa "fascinación polo modelo hiperrecaudador".