Garrigues evita falar do sobrecuste do Cunqueiro pero di que a fórmula pública do bipartito impactaría na débeda
A consultora sinalou como óptimo en 2008 unha sociedade mixta, ao 90% de capital privado, pero BNG e PSdeG destacan que se "elixiu outra fórmula".
Por Europa Press / Redacción | SANTIAGO DE COMPOSTELA | 28/11/2024 | Actualizada ás 14:59
Un representante da consultora Garrigues afirmou este xoves no Parlamento galego que a opción que avaliou o bipartito que gobernou a Xunta, entre 2005 e 2009, de construír o Hospital Álvaro Cunqueiro de Vigo a través da Sociedade Pública de Investimentos (SPI) "suporía un impacto no endebedamento" da Comunidade Autónoma.
Alfredo Fernández Rancaño, representante de Garrigues, compareceu na comisión de investigación da contratación pública porque a súa empresa elaborou en 2008 un informe para o Servizo Galego de Saúde (Sergas), cando entón gobernaba o socialista Emilio Pérez Touriño en coalición co BNG.
Durante o debate cos grupos, Fernández Rancaño relatou que, entón, a Administración galega quería "sondar" a opción dunha "colaboración público-privada". Así, o informe, no que el mesmo participou, sinalou como óptima a opción de constituír unha sociedade mixta, cun 90% de capital privado e un 10% de capital público, a través do SPI.
O bipartito descartou esta vía, tal e como lembrou o mércores na mesma comisión a entón conselleira de Obras Públicas, María José Caride, e planeaba facelo directamente a través do SPI. No entanto, Garrigues sinalou que esta alternativa, ao ser o SPI unha "unidade institucional non de mercado, impactaría no endebedamento público" en contra das regras fiscais europeas instauradas pola crise.
Neste contexto, Fernández Rancaño insistiu en que "necesariamente" a Xunta tiña que "colaborar co sector privado" para construír o Hospital Álvaro Cunqueiro. Con todo, non entrou no debate dos 470 millóns que supuxo a maiores a concesión, segundo o Consello de Contas, por non contratarse por separado a construción e os servizos, porque a consultora "non fixo unha análise financeiro", senón de legalidade.
O BIPARTITO "ELIXIU OUTRA FÓRMULA"
Por parte da oposición, o deputado do BNG Óscar Ínsua defendeu que, a pesar deste encargo a Garrigues, o goberno de Touriño e Quintana "elixiron outra fórmula moi distinta" á sociedade mixta. Para ese efecto esgrimiu que, nunha reunión do Consello da Xunta celebrada en 2009, aínda durante o bipartito, fíxose o encargo á SPI para que licitase as obras cun plan polo cal "en 2025 xa estaría pagado" o hospital. En cambio, denunciou Ínsua, a chegada do PP á Xunta supuxo un cambio de criterio "para que as empresas fagan caixa en época de crise".
Por parte do PSdeG, Elena Espinosa quedouse con que o estudo de Garrigues "non inclúe todas as alternativas posibles" e sostivo que "existía" a opción de levantar o Cunqueiro sen aumentar débeda.
En fronte, Roberto Rodríguez (PP) considera que o responsable de Garrigues puxo "negro sobre branco" ao afirmar que "a única" forma era a colaboración público-privada. "Este tema morreu, non hai caso", concluíu.
