Reconstrúen unha peza cerámica de 7.000 anos atopada no Monte Pindo
A Asociación Monte Pindo Parque Natural presenta a reprodución dun vasiño neolítico atopado nunha das covas deste espazo natural.
Por Galicia Confidencial | Carnota | 17/02/2016 | Actualizada ás 11:00
O profesor Xoán Ramón Vidal Romaní e un equipo de ceramistas lucenses veñen de materializar unha reprodución dun vasiño campaniforme neolítico, datada polo método da termoluminiscencia en 7.050 anos, e cuxos restos apareceron no Monte Pindo. Foi durante unha excursión hai xa oito anos do propio profesor e o Clube Espeleolóxico Maúxo nunha cova deste espazo natural.
Esta e outras pezas atopadas están depositadas fóra do espazo visitábel do Museo Arqueolóxico da Coruña. Trátaase dos restos arqueolóxicos máis antigos descubertos no MontePindo ata o momento, e confirmaría a presenza humana nas grutas do Olimpo Celta cando menos desde o Neolítico.
Un dos restos mellor conservados e máis interesantes consiste no beizo dun vasiño cerámica decorada de tipo campaniforme, estilo que definiu toda unha cultura dentro do Neolítico, e que xa foi datada entre 6.000 e 8.000 anos de antigüidade polo método da termoluminiscencia (TL) no Instituto Universitario de Xeoloxía Parga Pondal.
Os resultados desta investigacións foron publicaron no traballo 'Datación por termoluminiscencia de cerámicas de cuevas y cavidades graníticas en el NW de la Península Ibérica', que demostra, ademais, que o Monte Pindo estivo habitado case continuamente.
“Á vista do interese xerado pola reprodución nas redes sociais, a Asociación abrirá un prazo limitado para que quen o desexe poida facerse cun exemplar desta reprodución, o que se poderá facer presentando unha reserva na páxina tenda.montepindo.gal”, apunta esta entidade.
