Roubo de documentos nos arquivos Histórico Diocesano e Capitular de Tui

O Bispado de Tui-Vigo confirmou a presentación dunha denuncia ante a Garda Civil, o pasado 3 de decembro, pola falta de diversos obxectos de valor e documentos do Arquivo Histórico Diocesano e o Arquivo Capitular de Tui, aínda que matizou que "nada falta do inventario da Catedral e o seu Museo". Nun comunicado feito público este luns, fontes do Bispado lamentaron o ocorrido e sinalaron que "dos posibles obxectos subtraídos no Arquivo, estaban depositadas, para maior seguridade, pertenzas persoais do arquiveiro ou doadas a el para libre disposición en favor da Igrexa".

Por outra banda, sobre os documentos que se botaron en falta, as mesmas fontes explicaron que se trata de documentos "de menor importancia", que estaban pendentes de catalogación (por tanto, sen rexistrar definitivamente). Con todo, si se constatou a falta do contrato de arranxo dun retablo de 1780 "e algún que outro cartapacio". Finalmente, a institución eclesiástica apuntou que, aínda que as medidas de seguridade na Catedral e no Arquivo "están a ser coidadas", non se descarta nun futuro implementar "novos protocolos para unha maior seguridade".

En calquera caso, o Bispado incidiu en que non fará declaracións nin valoracións sobre o sucedido, "por respecto ás investigacións abertas" e trasladou a súa confianza en que ditas investigacións "poidan resolverse con prontitude". Fontes da investigación confirmaron que se iniciaron esas pescudas e que a denuncia revela roubos de xoias, moedas e documentos, polo menos desde 2001 ou 2002 e ata 2022. Polo momento, non se descarta ningunha hipótese, aínda que non houbo incidios de que se producisen roubos con forza ou con violencia.

Catedral de Tui | Fonte: Miguel Núñez - Arquivo