Satse reclama aumentar a oferta de emprego do Sergas para 2024, ante unha proposta "insuficiente"
Por E.P. | SANTIAGO DE COMPOSTELA | 09/12/2024 | Actualizada ás 12:10
O sindicato de enfermaría Satse manifestou o seu rexeitamento "absoluto" á proposta presentada ás organizacións sindicais da Mesa Sectorial de Sanidade -- CIG, CSIF, CCOO e UGT -- para a aprobación da oferta de emprego público do Servizo Galego de Saúde (Sergas) correspondente ao ano 2024, con 1.157 prazas previstas.
Nun comunicado, indica que esta oferta resulta "insuficiente para atender as necesidades estruturais do sistema sanitario". Sastse denuncia que a mesma é "escasa en canto ao número de prazas de enfermaría pois non se considera a consolidación de ningunha das máis de 300 prazas derivadas da diminución de xornada anual aprobada en 2023".
Alude, ademais, a un contexto de "temporalidade moi elevada e cun alto índice de xubilacións previstas nos próximos exercicios, superando ao número de profesionais recentemente egresados". Por iso, considera que esta oferta non inclúe "solucións reais nin eficaces para estabilizar os persoais sanitarios, o que agrava unha problemática que impacta negativamente tanto nos profesionais como na calidade asistencial".
Este feito, sostén, "xera un clima de desconfianza e frustración entre os colectivos afectados". Por este motivo, o sindicato esixe unha "rectificación inmediata" desta proposta e insta a "un aumento significativo no número de prazas ofertadas" así como a "a implementación dun plan estratéxico que priorice a estabilización do emprego sanitario".
"É imprescindible que o Sergas adopte medidas orientadas a reducir a temporalidade, asegurando condicións laborais dignas e un persoal estable que permita responder ás crecentes demandas asistenciais da poboación", incide tamén. "Só mediante unha oferta de emprego público consensuada, transparente e orientada a solucionar as carencias estruturais, poderase garantir un servizo sanitario eficiente e de calidade en Galicia", conclúe.
