Máis de 4 de cada 10 homes da área sanitaria de Ferrol sumáronse ao proxecto piloto de cribado de cancro de próstata
Trátase dun programa de detección "singular e novo fronte a outros intentos de cribado previos" ao ser "individualizado e adaptado ao risco de cada paciente de padecer" cancro de próstata, segundo sinalou o xefe de Uroloxía do CHUF, Andrés Rodríguez.
Por Europa Press / Redacción | FERROL | 13/12/2024 | Actualizada ás 17:19
O 41 % dos homes de entre 50 e 69 anos adscritos á Área Sanitaria de Ferrol participaron no proxecto piloto de cribado de cancro de próstata cando se chegou ao ecuador (6.000 convocados) do seu desenvolvemento. Segundo lembrou na mañá deste venres o xefe de Uroloxía do Complexo Hospitalario Universitario de Ferrol (CHUF), Andrés Rodríguez, este programa é unha iniciativa da Unión Europea na que se implicaron 25 institucións sanitarias dunha ducia de países membros.
A viabilidade do proxecto avalíase en cinco centros piloto, "un deles a Xunta, que o realiza a través da área sanitaria", subliñou. Trátase, engadiu Andrés Rodríguez, dun programa de detección "singular e novo fronte a outros intentos de cribado previos" ao ser "individualizado e adaptado ao risco de cada paciente de padecer" cancro de próstata. Rodríguez explicou ademais como funciona este protocolo que, co propósito final de "reducir a morbilidade e a mortalidade" ocasionada por este tipo de cancro, "permite detectar aqueles tumores máis agresivos que hai que tratar canto antes".
E iso materialízase a través de diferentes fases, comezando por unha analítica específica de TSA e, en función dos niveis existentes, pasando á seguinte, que consiste nunha consulta na que se lle realiza ao paciente unha entrevista e unha exploración, ademais dunha ecografía e unha determinación do risco "mediante unha calculadora validada para este propósito", precisou Andrés Rodríguez. Se o paciente ten un risco medio ou alto, pídeselles unha resonancia magnética e, tras unha nova valoración na que xa se inclúen tamén os datos desta proba, propónselle a realización dunha biopsia prostática de fusión.
Ata agora, asegurou o xefe de Uroloxía do CHUF, 156 pacientes foron convocados a unha primeira consulta "porque cumprían o criterio analítico incluído no protocolo" e realizáronse 48 resonancias magnéticas de próstata e un total de 8 biopsias prostáticas. "O balance é moi positivo polos resultados e polo funcionamento dinámico do equipo multidisciplinar que formamos", dixo Andrés Rodríguez en presenza do conselleiro de Sanidade, Antonio Gómez Caamaño, que aproveitou a ocasión para sinalar que "como ferrolán e sanitario é un orgullo que este proxecto se desenvolva aquí, na miña terra", ademais de animar aos profesionais sanitarios a que se vacinen contra o covid e a gripe, pois actualmente as cifras son "baixas".
