O Colexio de Xornalistas apoia a Xabier Fortes ante a "inaceptable" querela da parella de Ayuso
Por Europa Press / Redacción | SANTIAGO DE COMPOSTELA | 19/12/2024 | Actualizada ás 10:54
O Colexio Profesional de Xornalistas de Galicia (CPXG) ofrece apoio xurídico ao xornalista Xabier Fortes, que é socio, ante a "presión inaceptable" que supón a querela presentada por Alberto González Amador, parella da presidenta da Comunidade de Madrid, Isabel Díaz Ayuso, por referirse a el como "defraudador confeso".
A través dun comunicado conxunto, o Colexio de Xornalistas e a Col·legi de Periodistes de Catalunya mostran o seu respaldo tanto a Fortes como ao xornalista catalán Enric Juliana ante o que consideran un "intento de coartar a súa liberdade profesional".
O condutor de 'La noche en 24 horas' dirixiuse ao CPXG despois de recibir un burofax do avogado de González Amador no que se lle advirte dun acto de conciliación previo á interposición dunha querela por inxurias e calumnias tras referirse a o seu defendido como "autor confeso dunha fraude fiscal".
Ambos os colexios denuncian que "esta ameaza xudicial representa unha presión inaceptable contra os profesionais, vulnerando a liberdade de información e o acceso da cidadanía a información veraz". Neste contexto, as entidades alertan sobre o "uso abusivo da vía penal" contra xornalistas, unha práctica que "constitúe unha forma de intimidación".
