Cachan en Oia a un home de 65 anos que cultivaba 120 plantas de marihuana de tamaño medio na casa

O Equipo EBIO da Garda Civil de Tui investiga a un veciño de Santa María de Oia, de 65 anos, por un presunto delito contra a saúde pública na súa modalidade de cultivo ou elaboración de droga ao que lle incautaron 120 plantas de marihuana de tamaño medio. Segundo informou o Instituto Armado nun comunicado, desde o pasado mes de setembro iniciou diferentes pescudas para localizar diferentes plantacións destes cultivos, tanto en exterior como interior dependendo da época do ano.

Desta forma, tiveron coñecemento de que en Santa María de Oia, no interior dun galpón anexo a unha vivenda, podería estar instalada unha plantación interior de marihuana e secadeiro da mesma. Por iso, o pasado 11 de decembro realizaron as comprobacións necesarias para ver se a plantación seguía en funcionamento e deron un resultado positivo.

Neste sentido, constataron que había un forte cheiro característico destas plantas no exterior e comprobaron a trasfega de bolsas e produtos necesarios para o cultivo. Ademais, observaron a saída de gases nunha parede lateral do galpón e un programador eléctrico de rega automática ancorado á parede da infraestrutura. Os axentes personáronse no domicilio e entrevistáronse co propietario da leira que entregou, voluntariamente, as plantas do interior do domicilio, concretamente no ático. 

Alí había dous armarios utilizados para o cultivo de marihuana interior nos que localizaron 120 plantas, que foron intervidas e os obxectos utilizados para o cultivo quedaron baixo custodia do propietario, en calidade de depositario e foi informado de que os mesmos están a disposición xudicial. Tras recibir a orde de rexistro, emitida polo Xulgado de Primeira Instancia e Instrución número 3 de Tui, os axentes atoparon mecanismos e infraestruturas necesarias para o cultivo desas plantas.