Como quedan as peaxes na AG-55 e na AG-57 a partir do 2025?

O Diario Oficial de Galicia (DOG) recolle no seu boletín deste luns a adenda ao convenio coa concesionaria Autoestradas de Galicia, autorizado polo Consello da Xunta o pasado venres, para manter as bonificacións actuais das peaxes nas autoestradas A Coruña-Carballo (AG-55) e de Val Miñor (AG-57) e consolidar para 2025 as conxelacións na subida das peaxes de anos anteriores, actualizando conforme ao IPC.

Desta maneira, durante o próximo ano, as tarifas resultantes das peaxes na AG-55 e a AG-57 actualizarán as tarifas vixentes en 2024 segundo o 95 % do IPC interanual de outubro 2023 a outubro deste ano. É dicir, o 1,7 % a partir do 1 de xaneiro, manténdose, ademais, os descontos vixentes o próximo ano. Esta medida ten como obxectivo, segundo a Xunta, beneficiar aos case 28.000 usuarios diarios destas dúas vías autonómicas. "Será unha subida do 1,7 por cento, o mínimo fixado no contrato", expuxo o presidente da Xunta, quen incidiu en que "en moitos tramos non haberá subida e onde se concentren en ningún caso será superior a cinco céntimos por traxecto".

Por outra banda, o Consello deu luz verde á resolución dos contratos de concesión das autovías do Salnés, de Barbanza, Ourense-Celanvoa e Santiago-Brión, operación coa que o Executivo galego materializa a eliminación das peaxes en sombra que viñan pagando anualmente nestas infraestruturas. Esta operación, que se valora nun importe de 299 millóns, suporá que a Xunta deixará de pagar, polo canon comprometido ata o final das concesións, un importe de 641,1 millóns, o que suporá un aforro para as contas autonómicas de 342,1 millóns.

O BNG CELEBRA A ENTRADA EN VIGOR DAS NOVAS BONIFICACIÓNS DA AP-9

Pola súa banda, o deputado do BNG no Congreso, Néstor Rego, celebrou a entrada en vigor das novas bonificacións de ata o 75 % para as persoas usuarias da AP-9 a partir do 1 de xaneiro de 2025, ademais da apertura do viaduto na A-6. "As rebaixas, froito das negociacións realizadas polo BNG nas Cortes, suporán un alivio para as persoas usuarias da AP-9 grazas ao traballo da organización nacionalista, en contraposición ás decisións do PP de prorrogar a concesión desta infraestrutura e elevar anualmente as tarifas da mesma que lastran o desenvolvemento social e económico de Galicia", sostén.

"Implican descontos de 60 ata 75 % sumando a gratuidade da viaxe da volta cun 50 % no caso de realizar como mínimo 20 viaxes, 10 en cada sentido", explica o deputado do BNG no Congreso. Por outra banda, avanza que o BNG "seguirá traballando para conseguir o obxectivo da organización de ter unha AP-9 galega e libre de peaxes". Mentres, o BNG celebra tamén o final das obras no último dos viadutos da A-6. "No Acordo conseguido polo BNG recollíase a necesidade de terminar esta infraestrutura, o viaduto do Castro, antes de acabar o ano 2024 e estase cumprindo", afirma.

TRANSPORTISTAS CUALIFICAN DE "INSUFICIENTES" AS BONIFICACIÓNS

Pola súa banda, a asociación de transportistas Vieiros e Agtamar-Upta cualificaron de "insuficientes e insatisfactorias" as bonificacións ás peaxes para as autoestradas AP-9, AG-52, AG-55 e AG-57 aprobados polos seus titulares para a súa entrada en vigor en 2025. As organizacións expresan nun comunicado emitido este luns que o 50 % de redución nas viaxes para estas vías de pago "non vai terminar co desvío do tráfico pesado ás estradas convencionais".

Desta forma, consideran "con toda seguridade" que os tráficos non urxentes ou non apurados en horario "seguirán optando polas vías convencionais", polo que manifestan o seu descontento con que non se incluíse unha bonificación adicional "por concorrencia ou por ida e volta na mesma xornada" para vehículos pesados como si ocorre nos lixeiros. Ademais, tamén censuran que "non" fose analizado "con carácter previo" o estado de situación da mobilidade en Galicia para afrontar o "desconxestionamento" de puntos críticos, os tramos de maior sinistralidade ou o impacto da liberalización das peaxes nos accesos a parques empresariais, infraestruturas portuarias ou áreas metropolitanas.

Así as cousas, Vieiros e Agtamar-Upta cren que estas bonificacións "planas" das peaxes "non" son un modelo "eficaz, necesario nin responde as necesidades de mobilidade dos vehículos de transporte". Por tanto, consideran que a Xunta debe asumir a totalidade das competencias en materia de mobilidade por tratarse "do goberno máis próximo" e, por tanto, o que "máis coñecedor da realidade" do territorio.