Axudas para comprar vivendas en concellos galegos de menos de 10.000 habitantes e centros históricos

O Diario Oficial de Galicia (DOG) publica este martes axudas para comprar vivendas que inclúe tres modalidades. A primeira delas destínase a menores de 36 anos para a compra de vivendas en municipios de menos de 10.000 habitantes, a segunda inclúe subvencións para a adquisición en centros históricos, e a terceira contempla axudas para a compra de vivendas en réxime de protección oficial. Esta convocatoria foi presentada pola conselleira de Vivenda e Planificación de Infraestruturas, María Martínez Allegue, xunto ao director xeral do Instituto Galego da Vivenda e Solo, Heriberto García Porto.

Tal e como detallou a conselleira, a primeira destas liñas está destinada en exclusiva a menores de 36 anos e contempla axudas de ata 10.800 euros para a compra dunha vivenda en concellos que teñan menos de 10.000 habitantes. A segunda destas modalidades inclúe apoios para a compra de en centros históricos de ata 10.800, unha cifra que se incrementa ata os 12.800 euros para os menores de 36 anos e a 15.000 se o inmoble está situado nunha área Rexurbe. Por último, a terceira destas modalidades diríxese á vivenda protexida de réxime xeral e especial. A axuda ordinaria é de 12.000 euros, que se incrementa ata os 16.000 euros no caso de mozos de 36 anos (20.000 no caso de que o menor de 36 anos adquira o inmoble nas grandes cidades).

Estes apoios, aos que a Xunta destina un total de 3,8 millóns, poderán ser solicitados desde o próximo 27 de xaneiro ata o 15 de outubro e, segundo a conselleira, teñen o "obxectivo claro de facilitar o acceso á vivenda" e dar tamén unha oportunidade á xente nova para comprar. Ademais, sinalou que se tratan duns apoios "moi demandados". Pola súa banda, preguntado polos requisitos, o director xeral do Instituto Galego da Vivenda e Solo, Heriberto García Porto, destacou que nos municipios de menos de 10.000 habitantes o prezo máximo de adquisición é de 120.000 euros, unha cifra pola que se pode atopar "vivenda nova ou para rehabilitar".

Tamén lembrou que os ingresos non deben superar 3 veces o Iprem, o que supón uns 31.000 euros (no caso de que existan persoas con discapacidade, o límite ascende aos 42.000 euros). Pola súa banda, no caso da liña dirixida á adquisición nos centros históricos, o prezo das vivendas pode alcanzar un máximo de 300.000 euros en cidades, "un prezo que se pode adaptar aos prezos de mercados". Ademais, nas vivendas de protección oficial a cifra está limitado ao tope máximo legal de cada unha das vivendas adquiridas.

SEN PETICIÓNS PARA DECLARAR ZONAS TENSIONADAS

Por outra banda, a conselleira de Vivenda e Planificación de Infraestruturas, María Martínez Allegue, asegurou que a día de hoxe a Xunta aínda non recibiu ningunha petición de concellos, como o caso da Coruña ou Santiago, para declarar zonas de mercado de vivenda tensionadas. "É certo que tanto o Concello da Coruña como o de Santiago en declaracións aos medios manifestaron esta intención, pero a día de hoxe seguimos sen ningunha solicitude", afirmou nunha rolda de prensa na que sostivo que a Xunta esperará a ter esas peticións oficiais para, despois, analizar a documentación presentada, ver se ten encaixe no que establece a normativa estatal. "Se a documentación vén correcta, seremos áxiles na súa tramitación", dixo.

Preguntada polo estudo presentado na xornada do luns polo Concello de Santiago, que sinala que toda a cidade cumpre os requisitos para ser zona de mercado tensionado, a conselleira asegurou que só tivo coñecemento deste documento a través da rolda de prensa do Consistorio e que non lle foi trasladado nin comunicado oficialmente. Na rolda de prensa, Allegue lembrou que o Goberno galego "sempre foi claro" no sentido de "estar totalmente en contra" da lei estatal de vivenda e do "intervencionismo no mercado do aluguer". Con todo, recoñeceu que "a lei hai que cumprila" e débese aplicar mentres o Tribunal Constitucional non se pronuncie sobre os recursos presentado por comunidades como Galicia.

De feito, conforme afirmou, a Xunta modificou a súa propia normativa autonómica para aclarar como deben representar os concellos esta solicitude de declaración de mercado tensionado. Por iso, incidiu en que a pesar de estar "totalmente en contra desta medida", unha vez que os concellos formalicen a solicitude, de cumprirse os parámetros obxectivos que se establecen na normativa, a Xunta dará tramitación á posibilidade, ou non posibilidade desa declaración. Por último, subliñou que son os concellos os que deben elaborar o plan para pór freo ao incremento dos prezos do aluguer e acreditar que pode ser declarado zona de mercado tensionado e negou que a Xunta estea a pór trabas. "As esixencias son exactamente as que están establecidas na normativa estatal", afirmou.

O GOBERNO REIVINDICA AS SÚAS MEDIDAS PARA O ACCESO Á VIVENDA EN GALICIA

Pola súa banda, o delegado do Goberno en Galicia, Pedro Blanco, celebrou este martes as medidas anunciadas polo presidente do Goberno, Pedro Sánchez, para impulsar o acceso á vivenda en Galicia, "unha materia na que transferiu 526 millóns de euros á Xunta nos últimos anos". Entre as medidas citadas, destacou as axudas para o aluguer, para a adquisición de vivenda no rural, para nova vivenda de aluguer social, avais para a compra e construción ou axudas para que os mozos poidan independizarse, entre outras.

"Apostamos por un modelo público que achegue á cidadanía máis vivenda, mellor regulación e máis axudas e exencións fiscais", defendeu. Pedro Blanco indicou que nos últimos anos, o Goberno "multiplicou por oito" o investimento público en vivenda e aprobou numerosas medidas, "moitas delas sen precedentes". Tamén especificou que os 526 millóns de euros que chegan a Galicia son transferencias que o Goberno fai á Xunta co obxectivo de construír 1.406 vivendas públicas en Galicia" (1.142 son vivendas novas destinadas a aluguer social) e "rehabilitar outras 18.000".

Así mesmo, indicou que en outubro de 2024, o Ministerio de Vivenda e Axenda Urbana xa transferira á Xunta o 90 % do importe total comprometido (472 millóns de euros), polo que pediu "transparencia e axilidade" á Administración autonómica para executar eses fondos. Nesta liña, animou á Xunta a completar con fondos propios axudas como o Bono Aluguer Novo, "do que quedaron sen gozar moitos mozos galegos porque o Executivo autonómico deixou de financialo unha vez se esgotou a achega do Goberno de España".

O GOBERNO GALEGO TEME QUE AS MEDIDAS DE SÁNCHEZ QUEDEN EN FUME

Ao respecto, a conselleira de Vivenda e Planificación de Infraestruturas, María Martínez Allegue, trasladou o seu temor ante a posibilidade de que as novas medidas en materia de vivenda anunciadas este luns polo presidente do Goberno, Pedro Sánchez, queden "de novo" en "fume" como os 183.000 pisos que "ía construír". Preguntada polo anuncio do titular do Executivo estatal, Allegue dixo que "unha vez máis" o Goberno actúa con "falta de transparencia e de comunicación" coas comunidades autónomas, que son as que "teñen as competencias en materia de vivenda" tendo en conta que "o anunciado" era "totalmente descoñecido" a pesar das conferencias sectoriais e multilaterais que se manteñen sobre este asunto.

A conselleira, así mesmo, asegurou estar sorprendida por algunhas das políticas anunciadas. E é que, segundo dixo, nalgúns casos trátase de cuestións que a Xunta xa reclamara, como o traspaso das vivendas e o chan que a Sareb ten en Galicia. Así, lembrou que, ante a negativa, a Xunta tivo que adquirir estes inmobles. Tras iso, asegurou que tamén se descoñece como vai realizar a empresa pública a construción de vivenda e se a vai a cualificar como vivenda protexida. "Vai haber agora vivenda protexida do Estado?", preguntouse para cuestionar tamén sobre "quen o vai a facer" e "con que competencias". "Son moitas cuestións para as que non temos resposta porque non nos trasladan a información", incidiu.

A conselleira, ademais, sostivo que hai outras medidas que xa foron adoptadas por Galicia, como as garantías aos propietarios que aluguen que agora o Goberno di que vai implantar tomando o modelo francés; a cualificación permante idefinida como vivenda protexida; e a posta en marcha dunha sociedade de vivenda publica de Galicia. A iso, Allegue engadiu que a Xunta xa ten en funcionamento distintas medidas no ámbito fiscal. "Encómianos que copie as nosas medidas, pero seguimos esixindo ese diálogo, esa transferencia, porque estamos a falar de competencias que son autonómicas", dixo.

A conselleira puxo como exemplo desta falta de información o feito de que o secretario xeral de Vivenda e Urbanismo fose convocado a unha reunión multilateral en materia de vivenda, previa ao encontro entre conselleiros, da que, conforme lamentou, o Goberno galego aínda non dispón de información sobre o contido, máis aló de tres puntos da orde do día. "Non se trata só de ter conferencias sectoriais, senón de dotar de contido a esas conferencias e de escoitar ás comunidades autónomas", afirmou. Con todo, preguntada pola negociación do plan estatal, confiou en que "sexa o máis beneficioso" para o obxectivo común de facer fronte ao problema á vivenda aínda que "o relato pasado" non lles faga estar "moi esperanzados".