A Xunta non sabe que facer coa Fundación Cela

A investigación xudicial aberta na Fundación Cela, que ten que ver co ex xerente deste organismo e cos integrantes do seu patronato, xerencia e dirección, tamén afecta á Xunta de Galicia, que é de quen depende a entidade.

A Consellería de Cultura, que expresa o seu respecto polas decisións xudiciais adoptadas, anunciou que avaliará e estudará os pasos a seguir tras a xudicialización das contas desta fundación e tras a renuncia das súas funcións directivas da até agora directora-xerente en funcións da fundación Camilo José Cela.

A Secretaría Xeral de Cultura asumirá estas tarefas para garantir o normal funcionamento dos eventos vinculados ao centenario de nacemento do Premio Nobel, así como a xestión cotiá da fundación.

O Xulgado de Primeira Instancia e Instrución número 2 de Padrón ditou un auto no que se acorda a transformación das dilixencias previas en procedemento de tribunal do xurado pola indemnización por despedimento do ex xerente desta entidade.

Fontes da Xunta quitáronlle ferro a esta decisión e suliñaron este domingo que dita indemnización foi acordada no ano 2010, antes da súa conversión en fundación pública galega e, polo tanto, antes de ser xestionada polo Goberno autonómico.