O PPdeG urxe o "desbloqueo" no Congreso da transferencia da AP-9: "Galicia non pode soportar máis esta tomadura de pelo"
Pazos Couñago ironiza coa "efeméride" de que Pontón cumpra 21 anos no Parlamento: "A miña máis sinceira felicitación á deputada máis veterana".
Por Europa Press / Redacción | SANTIAGO DE COMPOSTELA | 07/02/2025 | Actualizada ás 18:08
O portavoz do Grupo Popular no Parlamento de Galicia, Alberto Pazos Couñago, informou de que os populares impulsarán unha resolución na Cámara autonómica para pedir á Mesa e Presidencia do Congreso o "desbloqueo" da tramitación da transferencia á comunidade galega da autoestrada AP-9. En rolda de prensa, o portavoz popular tamén se mostrou partidario de solicitar ao Ministerio de Transportes que avalíe a posibilidade do rescate desta infraestrutura, tendo en conta que esta decisión "sería máis económica" que as bonificacións de peaxes previstas polo Estado ata o fin da concesión en 2048.
Así, cargou contra a décimo oitava prórroga da Mesa do Congreso do prazo de presentación de emendas a este debate de transferencia desde a toma en consideración en xaneiro de 2024, que cifra en 33 ocasións desde a chegada de Pedro Sánchez á Moncloa. "Galicia e os galegos non podemos soportar máis esta tomadura de pelo constante por parte dunha Mesa do Congreso tutelada polos socialista, que fai caso omiso a unha demanda aprobada por unanimidade neste Parlamento e que tamén contou co voto favorable á súa tramitación no Congreso de todos os grupos parlamentarios, fóra de Vox", afirma.
Pazos Couñago insta os socialistas galegos a "alzar a súa voz ante esta nova burla e desprezo de Pedro Sánchez a todos os galegos". Tamén se referiu á proposta do PSdeG no seu documento marco para o congreso autonómico de rescate da autoestrada, o que contrasta co rexeitamento expresado polo ministro de Transportes, Óscar Puente, en recentes declaracións nas que falou de que era "inasumible para o Estado".
"EFEMÉRIDE" DE 21 ANOS DE PONTÓN COMO DEPUTADA
O portavoz popular dedicou o final da súa intervención en rolda de prensa para ironizar coa "efeméride" de que Ana Pontón cumpra 21 anos como deputada na Cámara galega, que identifica o "radicalismo e as propostas demagóxicas", "sen saber durante todo este tempo o que é xestionar un só euro de diñeiro público". "Permitídeme que traslade a miña máis sinceira felicitación á deputada máis veterana deste Parlamento que hoxe cumpre, nin máis nin menos, que 21 anos consecutivos ocupando un escano nesta Cámara, o que se traduce nunha presenza consecutiva de seis lexislaturas. Así que, compañeira Ana Pontón, felicidades por este aniversario. Desexámosche a mellor das sortes para que continúes moitos anos nestes bancos da oposición do Parlamento de Galicia", asegurou de forma satírica. "Non se pode negar o mérito", concluíu.
