A Xunta confirma que en Galicia volve ter un"problema grave" co narcotráfico
"Pode haber o perigo de regresar a situacións que parecían esquecidas e que, desde logo, son non desexadas", di Rueda.
Por Europa Press / Redacción | SANTIAGO DE COMPOSTELA | 10/02/2025 | Actualizada ás 19:35
O presidente da Xunta, Alfonso Rueda, celebrou que o ministro do Interior, Fernando Grande-Marlaska, sexa consciente do "problema grave" que hai co narcotráfico e comprometese un incremento de medios. Afirmou que, á espera de concretar en que se traduce ese compromiso, o Goberno central contará coa "colaboración" do seu Executivo en calquera medida neste sentido.
Marlaska formulou este compromiso nunha entrevista coa Cadea SER, na que tampouco se pechou á creación dunha base de Aduanas na Costa da Morte. Pola súa banda, Rueda asegurou que non ten ningunha comunicación concreta do Ministerio relativa a un incremento de medios para combater o narcotráfico na comunidade. "Escoitado o que dixo o ministro, tentaremos que se nos dea máis detalle. E por suposto ofrecemos a colaboración da Xunta neste sentido", aseverou.
Así, insistiu en que se alegra "moitísimo" de que Interior sexa "consciente" do "problema grave" que hai en Galicia co narcotráfico. Sobre todo, dixo, porque pode "haber o perigo" de "regresar a situacións que parecían esquecidas e que, desde logo, son non desexadas", en relación ao que supuña o tráfico de drogas en décadas pasadas. Rueda concluíu que combater o narcotráfico debe ser "unha tarefa de todos", do Goberno e "en diálogo" coa Xunta.
