O químico Fernando Calvet, modernizador da química orgánica en Galicia, nomeado Científico do Ano pola RAGC
Segundo trasladou a Academia a través dun comunicado, o acto central de homenaxe terá lugar o 8 de outubro no marco do Día da Ciencia en Galicia, pero programaranse actividades para dar a coñecer a figura do científico e as súas contribucións ao conxunto da sociedade durante todo o ano.
Por Europa Press / Redacción | SANTIAGO DE COMPOSTELA | 17/02/2025 | Actualizada ás 14:28
A Real Academia Galega de Ciencias (Ragc) elixiu ao químico Fernando Calvet como Científico Galego do Ano, ao que destacou por "achegar unha nova forma de entender a química na comunidade". Deste xeito, detallou que este foi o introductor da bioquímica moderna en España e o modernizador da química orgánica en Galicia. Segundo trasladou a Academia a través dun comunicado, o acto central de homenaxe terá lugar o 8 de outubro no marco do Día da Ciencia en Galicia, pero programaranse actividades para dar a coñecer a figura do científico e as súas contribucións ao conxunto da sociedade durante todo o ano.
Fernando Calvet, natural de Barcelona, iniciou a súa formación na Cidade Condal, onde tamén comezou a súa carreira docente en 1922, pero foi no ano 1929 cando gañou a cátedra de Química Orgánica da facultade de Ciencias da Universidade de Santiago, que nese momento non dispuña de ningún laboratorio químico. Neste contexto, conseguiu pór en marcha un laboratorio para prácticas de Química Orgánica e outro destinado a traballos de investigación, "creando un grupo moderno, equiparable aos mellores do Estado e pioneiro nas ciencias galegas".
O inicio da Guerra Civil sorprendeuno en Vigo, onde descubriu a través da prensa que fora destituído como catedrático por "catalanista, antimilitarista e polas súas ideas separatistas", así como por ser "francamente comunista". Para evitar represións, e como dispuña dunha bolsa para continuar estudos en Estocolmo, foise á cidade sueca en setembro de 1936. Con todo, no ano 1938 negociou coas autoridades franquistas no exterior a súa volta a España coa promesa de que "non habería represalias", pero nada máis entrar no país foi apresado nun cárcere de Tui. Con todo, a Ragc destacou que Calvet achegou un "aire europeo" ás formas docentes e apostou pola "sociabilidade universitaria", organizando xornadas de té, música e excursións. Ademais, lembrou que en 2017 realizouse unha película sobre a vida de Calvet, 'Os fillos do sol'.
