A Garda Civil investiga sete persoas por unha estafa na venda dun cubrecolchón

A Garda Civil de Muros abriu unha investigación contra sete persoas como presuntas autoras dun delito de estafa e outro de usurpación de estado civil, tras presuntamente enganar unha muller maior na venda dun cubrecolchón por un importe moi superior ao acordado.

Segundo informou o Instituto Armado, os feitos tiveron lugar o pasado 19 de xullo, cando un comercial a domicilio se presentou na vivenda da afectada para ofrecerlle un cubrecolchón por 125 euros. Porén, ao recibir a compra, a muller descubriu que lle entregaran máis artigos dos acordados, polo que pediu axuda a unha veciña para revisar a documentación.

Ao analizar os papeis, a veciña comprobou que a vítima asinara dous contratos de financiamento sen ser consciente diso: un por 4.885,67 euros e outro por 1.814,24 euros, o que sumaba un total de 6.699 euros.

 

MODUS OPERANDI E INVESTIGACIÓN

A investigación determinou que os presuntos autores desta estafa operaban aproveitándose da vulnerabilidade das vítimas, normalmente persoas maiores que viven soas. Mediante ofertas enganosas e promesas de agasallos, lograban que os afectados asinasen contratos de financiamento a longo prazo sen comprender realmente as condicións.

A Garda Civil identificou aos sete investigados, que residen en Illescas, Bergondo, Culleredo e Vigo. A colaboración de diversas unidades do corpo permitiu a localización de dous deles en Carnota coa axuda da Policía Local.

Os sete sospeitosos enfróntanse agora a cargos por delito de estafa e usurpación de estado civil. A investigación continúa aberta para determinar se houbo máis vítimas afectadas por este método de fraude.