Xulgan un home por agredir á súa parella no Barco de Valdeorras

A Audiencia Provincial de Ourense celebrará este venres o xuízo contra un home acusado de insultar, agredir e encerrar á súa parella na vivenda que ambos compartían no Barco de Valdeorras. O Ministerio Fiscal solicita ata catro anos de prisión polos feitos ocorridos en setembro de 2023.

Segundo o escrito da Fiscalía, o acusado, de nacionalidade brasileira e sen antecedentes penais, regresou ao domicilio o 21 de setembro de 2023 tras a súa xornada laboral e iniciou unha discusión coa súa parella, durante a cal a menosprezou con insultos.

No transcurso da disputa, o procesado agrediu á vítima con dúas patadas e unha puñada no xeonllo dereito. Ao día seguinte, antes de saír para traballar, pechou a única porta da vivenda con chave, deixando á muller encerrada e sen posibilidade de saír ata o seu regreso.

A vítima tivo que solicitar axuda á Garda Civil, que acudiu ao lugar para liberala.

PENAS

A Fiscalía considera os feitos constitutivos dun delito de lesións e doutro de detención ilegal, polos que reclama para o acusado un ano de prisión polo primeiro e tres polo segundo. De maneira alternativa, no caso de que non se considere detención ilegal, pide que se lle condene por un delito de coaccións cunha pena dun ano de prisión.

Ademais, a Fiscalía solicita que o procesado cumpra 20 días de localización permanente por un delito de inxurias contra a súa parella.