Falece un operario e outro resulta ferido nun accidente laboral en Chantada
O suceso tivo lugar cando traballaban na instalación dun cable de tensión en San Fiz de Asma
Por Europa Press / Redacción | Lemos | 14/03/2025 | Actualizada ás 19:23
Un operario faleceu e outro resultou ferido este venres nun accidente laboral ocorrido no municipio lucense de Chantada, na estrada LU-617, á altura de San Fiz de Asma. Segundo informou o 112 Galicia, o suceso produciuse ao mediodía, cando os traballadores manipulaban un cable de tensión e este partiu ou se soltou, provocando a caída de dez metros de dous operarios.
A alerta foi dada por un particular ás 12:25 horas, solicitando asistencia urxente para unha persoa que caera desde certa altura. De inmediato, foron mobilizados os servizos de emerxencia, incluíndo os profesionais de Urxencias Sanitarias de Galicia-061, a Garda Civil, a Policía Local e efectivos de Protección Civil de Chantada.
Unha vez no lugar, os equipos de rescate comprobaron que, ademais do falecido, había un segundo operario ferido nunha zona de difícil acceso. Por este motivo, requiriuse a intervención dos Bombeiros de Chantada para poder chegar ata el e proceder ao seu rescate.
A Garda Civil confirmou que se trata dun accidente laboral. Segundo as primeiras investigacións, catro traballadores estaban instalando un cable de tensión nunha leira cando se produciu o fallo no material, provocando a caída de dous deles. As autoridades xa están investigando as circunstancias exactas do suceso.
