O custo laboral galego sobe un 4,5%, ata case 3.000 euros, en 2024
Con todo, segue máis de 300 euros por baixo da media do estado.
Por Europa Press / Redacción | SANTIAGO DE COMPOSTELA | 17/03/2025 | Actualizada ás 10:09
O custo laboral medio por traballador e mes en Galicia (que inclúe as remuneracións e as cotizacións sociais) subiu case un 4,5% no cuarto trimestre de 2024 en relación ao mesmo período de 2023, ata situarse nos 2.947,40 euros, segundo datos publicados este luns polo Instituto Nacional de Estatística (INE), recollidos por Europa Press.
Esta cifra supón quedar máis de 300 euros por baixo da media nacional, xa que no total de España o custo laboral alcanzou a súa cifra máis alta nun cuarto trimestre desde o ano 2000, con 3.258,14 euros, un 3,6% máis. Por sectores, o custo laboral na industria en Galicia incrementouse un 6,6%, ata 3.672,45 euros, mentres que na Construción foi de 3.142,91 euros (-0,47%) e nos servizos, de 2.763,87 euros, un 4% máis.
O custo salarial en Galicia foi de 2.195,84 euros, un 4,77% máis, mentres que a media nacional subiu un 3,5%, con 2.442,32 euros. Entre outros custos, o custo por cotizacións obrigatorios creceu en Galicia un 5,7% de media, con máis de 702 euros.
DATOS ESTATAIS
A nivel estatal, o custo laboral medio por traballador e mes subiu un 3,6% no cuarto trimestre de 2024 en relación ao mesmo período de 2023, ata situarse en 3.258,14 euros, a súa cifra máis alta nun cuarto trimestre desde o ano 2000, sempre segundo informa o INE.
Con este incremento do custo laboral acumúlanse 16 trimestres consecutivos de alzas. No entanto, o do cuarto trimestre de 2024 foi o menos pronunciado desde o primeiro trimestre de 2021, cando aumentou un 1,4%.
