A Xunta contra o traspaso de competencias migratorias a Cataluña

A conselleira de Política Social e Igualdade, Fabiola García, mostrou o seu rexeitamento ao acordo bilateral do Goberno central con Cataluña para delegar as competencias en materia migratoria. Así o expresou a conselleira este luns, cando participou na XIII Conferencia Sectorial de Inmigración por videoconferencia.

Segundo explican nun comunicado, Fabiola García defendeu na súa quenda de intervención que a delegación de competencias "xera desigualdades" entre as comunidades autónomas.

Ademais, criticou que o Executivo central non facilitase máis información sobre este acordo, "que se incorporou a última hora na orde do día e que non foi tratado previamente na reunión preparatoria da conferencia". Nesta liña, a conselleira lamentou que, "unha vez máis", coñeceu a decisión pola prensa, sobre todo tendo en conta que se trata de "temas sensibles como é a acollida de migrantes".

A conselleira de Política Social e Igualdade, Fabiola García, participa por videoconferencia na Conferencia sectorial de Inmigración. MONICA ARCAY CARRO | Fonte: Europa Press